బాలీవుడ్లో కరోనా కలకలం సృష్టిస్తోంది. ఇప్పటికే పలువురు ప్రముఖ నటులు వైరస్ బారినపడగా.. తాజాగా నటి ఆలియా భట్కు కరోనా సోకింది. ఈ విషయాన్ని ఆమె సామాజిక మాధ్యమాల ద్వారా వెల్లడించింది. ప్రస్తుతం ఇంట్లోనే ఐసోలేషన్లో ఉన్నట్లు తెలిపింది.
కొద్దిరోజుల క్రితం ఆలియా బాయ్ఫ్రెండ్ రణ్బీర్ కపూర్ కరోనా బారినపడ్డాడు. అప్పుడు కూడా ఆమె పరీక్షలు చేయించుకోగా నెగిటివ్గా తేలింది. తాజాగా మరోసారి చేసుకున్న పరీక్షల్లో పాజిటివ్ వచ్చింది.
"హాయ్ ఆల్.. నాకు కరోనా పరీక్షల్లో పాజిటివ్గా తేలింది. వెంటనే నేను స్వీయనిర్భంధంలోకి వెళ్లా. డాక్టర్ల పర్యవేక్షణలో అన్ని జాగ్రత్తలూ తీసుకుంటున్నా. మీ ప్రేమ, మద్దతుకు కృతజ్ఞతలు. అందరూ జాగ్రత్తగా ఉండండి" అంటూ ఇన్స్టాలో పోస్ట్ పెట్టింది ఆలియా.
ఆలియా ప్రస్తుతం రాజమౌళి దర్శకత్వంలో తెరకెక్కుతోన్న 'ఆర్ఆర్ఆర్'లో నటిస్తోంది. రామ్చరణ్, తారక్ హీరోలు. అలాగే సంజయ్ లీలా భన్సాలీ దర్శకత్వంలో 'గంగూబాయ్ కతియావాడి', అయాన్ ముఖర్జీ దర్శకత్వంలోబ్రహ్మాస్త్ర' చేస్తోంది. ఇందులో రణ్బీర్ కపూర్ హీరో. అమితాబ్, నాగార్జున కీలకపాత్రలు పోషిస్తున్నారు.
