బాలీవుడ్ నటులు రిచా చద్దా, అలీ ఫజల్ ఈ ఏడాది ఏప్రిల్లో మూడుముళ్ల బంధంతో ఒక్కటవ్వాల్సింది. అయితే కరోనా కారణంగా ఆలస్యం అయ్యింది. ఈ ఏడాది డిసెంబరులో వీరిద్దరూ వివాహం చేసుకోనున్నట్లు వార్తలు వినిపించాయి. తాజాగా, ఓ మీడియాకు ఇచ్చిన ఇంటర్వ్యూలో మాట్లాడిన అలీ, రిచా.. ఈ ఉహాగానాలకు తెరదించారు. వచ్చే ఏడాదిలో పెళ్లి చేసుకోవాలని నిర్ణయించుకున్నట్లు వెల్లడించారు.
చాలా మంది ఈ వివాహానికి హాజరు కావాలని కోరుకుంటున్న నేపథ్యంలో వచ్చే ఏడాదికి వాయిదా వేసినట్లు రిచా తెలిపింది. ఇప్పటికే ముంబయి, లఖ్నవూ, దిల్లీ నగరాల్లో వివాహ ఉత్సవాలకు ఏర్పాట్లు చేశారు. మహమ్మారి కారణంగా అన్ని కార్యకలాపాలను రద్దు చేయాల్సి వచ్చింది. అయితే, జరిగిందంతా తమ మంచికేనని.. అలీ తెలిపాడు.
2012లో ఓ సినిమా షూటింగ్లో అలీ, రిచాల మధ్య స్నేహం చిగురించింది. 2015లో ప్రేమలో పడినప్పటికీ.. 2017లో అభిమానులకు ఈ విషయాన్ని బహిరంగంగా ప్రకటించారు. కాగా, ఈ ఏడాది ప్రారంభంలో మాల్దీవుల్లో రిచాకు అలీ మ్యారేజ్ ప్రపోజ్ చేశాడు. దీంతో ఈ జంట వివాహానికి సిద్ధమైంది.
