తమిళంతో పాటు.. తెలుగు, హిందీ భాషల్లోనూ అభిమానులను సంపాదించుకున్న నటుడు విక్రమ్. 'పితామగన్‌'లో తనదైన నటనకు జాతీయ అవార్డు సొంతం చేసుకున్నాడు. 1990లో 'ఎన్‌ కాదల్‌ కణ్మణి' చిత్రంతో పరిచయమైన అతడు.. అరంగేట్రంలోనే మలయాళం, తెలుగు భాషల్లో నటించాడు. 'చిరునవ్వుల వరమిస్తావా'తో తొలిసారి తెలుగుతెరపై కనువిందు చేశాడు విక్రమ్. ఆ తర్వాత 'విక్కీ' అనే మరో సినిమా చేశాడు.
'బంగారు కుటుంబం', 'ఆడాళ్లా మజాకా', 'ఊహ', 'అక్క బాగున్నావా'... ఇలా 90వ దశకంలో పలు తెలుగు సినిమాలు చేశాడు. తమిళంలో స్టార్‌ కథానాయకుడిగా గుర్తింపు తెచ్చుకొన్నాడు. ప్రస్తుతం కోలీవుడ్ ఇతడు చేసిన సినిమాలు తెలుగులోనూ అనువాదాలుగా విడుదలవుతున్నాయి. విక్రమ్‌కి తెలుగునాట మంచి గుర్తింపు ఉన్నప్పుడే... 'శివపుత్రుడు', 'అపరిచితుడు' చిత్రాలు తీశాడు. ఇవి సూపర్హిట్లు కావడం వల్ల అతడికి అభిమానులు మరింత పెరిగారు. 'రావణ్', 'నాన్న' చిత్రాలతో విక్రమ్ ప్రేక్షకులను మెప్పించాడు. శంకర్‌ దర్శకత్వం వహించిన 'ఐ' కోసం అతడు.. భారీగా బరువు తగ్గి నటించాడు.
కెరీర్లో భారీ బడ్జెట్ చిత్రాలు..
ప్రస్తుతం విక్రమ్ తమిళం, హిందీ భాషల్లో రూ.300 కోట్ల పైచిలుకు వ్యయంతో రూపొందుతోన్న 'మహావీర్‌ కర్ణ', 'కోబ్రా' సినిమాల్లో నటిస్తున్నాడు. అంతేకాకుండా మణిరత్నం దర్శకత్వంలో తెరకెక్కుతోన్న 'పొన్నియిన్ సెల్వన్' చిత్రంలోనూ కనిపించనున్నాడు.
క్రిస్టియన్‌ తండ్రి, హిందూ తల్లికి.. 1966, ఏప్రిల్ 17న పుట్టాడు విక్రమ్. ఈ హీరో స్వస్థలం మద్రాస్‌. విక్రమ్ అసలు పేరు కెన్నడీ జాన్‌ విక్టర్‌. మద్రాసు లయోలా కాలేజీలో చదువుకొన్నాడు. శైలజా బాలకృష్ణన్‌ని 1992లో వివాహం చేసుకున్నాడు. ఈ దంపతులకి ఒక అమ్మాయి, ఒక అబ్బాయి. అబ్బాయి ధ్రువ్‌ 'అర్జున్‌రెడ్డి' రీమేక్‌తో కథానాయకుడిగా పరిచయమయ్యాడు. విక్రమ్ నటుడిగానే కాకుండా.. నిర్మాతగా, గాయకుడిగా ప్రతిభ చాటాడు.
ఇదీ చూడండి.. దర్శకత్వ బాధ్యతల నుంచి తప్పుకుంటా!
