YouTube playable : ఆన్లైన్ గేమర్స్కు అదిరిపోయే న్యూస్. యూట్యూబ్ వెబ్సైట్లోనే నేరుగా గేమ్స్ ఆడుకునే విధంగా ఓ సరికొత్త ప్రొడక్ట్ను తీసుకురావడానికి గూగుల్ సన్నాహాలు చేస్తోంది. ఇప్పటికే అంతర్గతంగా ఈ ప్రొడక్టును టెస్టింగ్ చేస్తోంది యూట్యూబ్.
ఈ సరికొత్త యూట్యూబ్ ప్రొడక్టును.. వెబ్ బ్రౌజర్, ఆండ్రాయిడ్ మొబైల్స్, యాపిల్ ఐఫోన్ యూజర్లు అందరికీ అందుబాటులోకి తేనుంది గూగుల్. ఫలితంగా యూట్యూబ్లోనే నేరుగా ఆన్లైన్ గేమ్స్ ఆడుకునే అవకాశం ఏర్పడుతుంది.
ప్లేయబుల్
YouTube Gaming Platform playable : వాల్స్ట్రీట్ జర్నల్ ప్రకారం, గూగుల్ ఇప్పటికే తన ఉద్యోగులకు 'ప్లేయబుల్' పేరుతో తెచ్చిన సరికొత్త యూట్యూబ్ ప్రొడక్టును టెస్ట్ చేయాలని సూచించింది. ముఖ్యంగా ఆర్కేడ్ గేమ్ స్టాక్ బౌన్స్ లాంటి గేమ్లను టెస్టింగ్ కోసం అందుబాటులో ఉంచింది.
''గేమింగ్ కోసం ప్రత్యేకమైన వేదిక సృష్టించాలని ఎప్పటి నుంచో అనుకుంటున్నాం. చాలా కొత్త ఫీచర్స్ను టెస్ట్ చేస్తున్నాం కూడా. కానీ ప్రస్తుతం ఏ విషయం కూడా అధికారికంగా ప్రకటించడానికి అవకాశం లేదు.'' అని ఓ యూట్యూబ్ అధికార ప్రతినిధి తెలిపారు.
గేమర్స్కు ఆన్లైన్ స్వర్గం
Playable for Gamers : ఆన్లైన్ గేమ్స్ హోస్ట్ చేయడానికి, స్ట్రీమింగ్ చేయడానికి, లైవ్ స్ట్రీమ్ వీడియోలు చూడడానికి యూట్యూబ్ మంచి వేదిక. అందుకే ఆన్లైన్ ప్రకటనలు రోజురోజుకూ తగ్గుతున్న వేళ.. యూట్యూబ్ ఈ సరికొత్త గేమింగ్ ప్లాట్ఫాంను తెచ్చేందుకు ప్రయత్నాలు చేస్తోంది. ఒక వేళ ఇదే సాకారమైతే యూట్యూబ్ వేదికగా ఆన్లైన్ గేమర్స్కు మంచి ఆదాయం సంపాందించే అవకాశం ఏర్పడుతుంది. యూట్యూబ్కు కూడా మంచి యాడ్ రెవెన్యూ వస్తుంది.
చాలా గేమ్స్ ఉన్నాయి..
Playable Games : ప్రస్తుతం ఇంకా టెస్టింగ్ దశలో ఉన్న ప్లేయబుల్లో.. ఆడడానికి చాలా గేమ్స్నే అందుబాటులో ఉంచింది గూగుల్. స్టాక్ బౌన్స్ అనేది ప్రత్యేకంగా యాడ్ - సపోర్టెడ్ ఆర్కేడ్ గేమ్. ఈ గేమ్లో ప్లేయర్స్.. బౌన్సింగ్ బాల్తో లేయర్లుగా ఉన్న బ్రిక్స్ను స్మాష్ చేయాల్సి ఉంటుంది.
యూట్యూబ్ షాపింగ్ ఛానల్
YouTube Shopping Channel : యోన్హాప్ వార్తా సంస్థ ప్రకారం, గూగుల్ మరో సరికొత్త ఫీచర్ను అందుబాటులోకి తెస్తోంది. 2023 జూన్ 30న దక్షిణ కొరియాలో అధికారికంగా యూట్యూబ్ మొదటి అధికారిక షాపింగ్ ఛానల్ను ప్రారంభించనుంది.
యూట్యూబ్ హవా
యూట్యూబ్ తనదైన శైలిలో యూజర్లను ఆకట్టుకుంటూ సోషల్ మీడియాను ఒక ఊపు ఊపేస్తోంది. ఎలాంటి సమాచారం అయినా వీడియోల రూపంలో ఇక్కడ లభిస్తుంది. యూట్యూబ్ కూడా ఎప్పటికప్పుడు సరికొత్త ఫీచర్లను తీసుకొస్తూ యూజర్లను ఆకట్టుకుంటూ ఉంటుంది. ఇటీవలే యూట్యూబ్ తమ మోనటైజేషన్ ప్రక్రియను కూడా సులభతరం చేసింది. దీని వల్ల యూట్యూబర్లకు మంచి రెవెన్యూ జనరేట్ కావడానికి అవకాశం ఏర్పడింది.
