కరోనా భయంతో చేతులను శుభ్రంగా కడుక్కొంటున్నాం సరే. పదే పదే ఉపయోగించే ఫోన్, ఇయర్ఫోన్లను మాత్రం పూర్తిగా పట్టిచుకోవడం మానేశాం. వీటి మీద ఉండే క్రిములు, బాక్టీరియా వల్ల మనం అనారోగ్యం పాలయ్యే అవకాశముంది. ఈ విషయాన్ని దృష్టిలో ఉంచుకొని నూతన యూవీ శానిటైజర్ను విడుదల చేసింది శాంసంగ్. ఇది ప్రపంచవ్యాప్తంగా అందరికీ అందుబాటులోకి తెచ్చినట్లు వెల్లడించింది. బాక్టీరియాను, క్రిములను ఈ శానిటైజర్ పరికరం 99 శాతం చంపేస్తుందని... కరెంట్ లేనప్పుడు ఉపయోగించుకునేలా వైర్లెస్ ఛార్జింగ్ సదుపాయం ఉన్నట్లు తెలిపింది.
" ఈరోజుల్లో వ్యక్తిగత పరిశుభ్రత చాలా ముఖ్యం. అందుకే బాక్టీరియా, క్రిములను చంపేసే యూవీ శానిటైజర్ తయారు చేశాం. ఇది ఛార్జింగ్ చేసుకొని వాడుకోవచ్చు. దీన్ని శాంసంగ్ సీ&టీ తయారుచేసింది. జూన్ నెల నుంచే ఈ పరికరాన్ని పరిమితంగా శాంసంగ్ స్టోర్లలో అందుబాటులోకి తెచ్చాం. ఇప్పుడు వాటిని విశ్వవ్యాప్తం చేశాం. ఈ శానిటైజర్ సాయంతో 10 నిమిషాల్లోనే ఎలక్ట్రానిక్ పరికరాలపై క్రిములను చంపేయొచ్చు"
-- శాంసంగ్ సంస్థ
ఈ శానిటైజర్ పరికరానికి పైనా, కింద రెండు యూవీ లైట్లు ఉన్నాయి. ఇందులో మనం ఫోన్లు వంటి చిన్న చిన్న ఎలక్ట్రానిక్ పరికరాలను పెట్టినప్పుడు అది 10 నిమిషాల్లో క్రిములను చంపేసి... ఆటోమేటిక్గా ఆగిపోతుంది. ఇంటర్టెక్, ఎసీజీఎస్ సంస్థలు టెస్టులు నిర్వహించి ధ్రువీకరణ పత్రం ఇచ్చినట్లు సంస్థ ప్రతినిధులు తెలిపారు. ఈ శానిటైజర్ సాయంతో ఈ-కోలీ, స్టాఫిలోకొకస్, కాండిడా ఆల్బికన్స్ వంటి బాక్టీరియా, ఫంగస్ ముప్పును తప్పించుకోవచ్చని స్పష్టం చేశారు.
ఇదీ చూడండి: ఆటోమేటిక్ శానిటైజర్... తాకకుండానే చేతులు శుభ్రం
