గ్రహాంతరవాసులు నిజంగా ఉన్నారా..? లేరా..?

గ్రహాంతరవాసులు నిజంగా ఉన్నారా? లేరా? అన్నది నేటికీ మిలియన్ డాలర్ల ప్రశ్న. కానీ అందుకు ఊతమిచ్చేలా ఏదో అంశం తెరపైకి రావడం.. దాని చుట్టూ చర్చ జరగడం ఏళ్లుగా జరుగుతున్నదే. ఎక్కడో ఓ ప్రదేశంలో ఎగిరే పళ్లాన్ని చూసామని అందులోంచి ఎవరో దిగడం కూడా చూసామని చాలా మంది చెప్పినవారే. కానీ అందుకు సంబంధించిన వివరాలు మాత్రం ఇంకా మిస్టరీగానే ఉన్నాయి. ప్రముఖ బ్రిటీష్ భౌతిక శాస్త్రవేత్త స్టీఫెన్ హాకింగ్ సైతం గ్రహాంతర వాసుల ఉనికి గురించి ప్రస్తావించడమే కాదు.. వారి సందేశానికి స్పందించ‌డం చాలా ప్రమాద‌క‌ర‌మ‌ని హెచ్చరించారు కూడా. అయితే ఆస్ట్రేలియాకు చెందిన పరిశోధకులు మాత్రం గ్రహాంతర వాసుల ఉనికి తమకు కనిపిచలేదని అంటున్నారు . దాదాపు కోటికిపైగా నక్షత్రాలను స్కాన్‌ చేసినా తమకు ఎలియన్స్‌ జాడా ఎక్కడా కనిపించలేదని అంటున్నారు. అయితే కేవలం ఈ ఒక్క అన్వేషణకే గ్రహాంతర వాసులు లేరని చెప్పడం సమంజసం కాదని అంటున్నారు మరికొంతమంది.. ఇంతకీ గ్రహాంతర వాసులు ఉన్నారా ? లేరా ?. ఇందుకు సంబంధించిన ఏవైనా సంకేతాలు వెలువడ్డాయా..?

అనంతమైన విశ్వంలో లెక్కకు మించిన గ్రహాలు. భూగోళం మాదిరిగానే ఇతర గ్రహాలపైనా జీవరాశి ఉందని.. అక్కడ జీవించేందుకు అవకాశం ఉందని పరిశోధకులు గట్టిగా నమ్ముతున్నారు. అందుకు తగ్గట్టుగానే ఇతర గ్రహాలపై జీవించేందుకు అనువైన వాతావరణం ఉందా లేదా.. అన్న ప్రయోగాలకు అంతేలేదు. అయితే విశ్వంలో మనకన్నా ఎన్నో రెట్లు తెలివైన జీవులు ఉన్నాయని వారు మనకు తెలియకుండానే సంకేతాలు పంపుతున్నారని వారే గ్రహాంతర వాసులని ఎప్పట్నుంచో చెబుతున్నారు. ఆధునిక సాంకేతిక పరిజ్ఞానాన్ని వినియోగించడంలో వారు మనుషుల కన్నా ఎన్నో రెట్లు తెలివైన వారన్నది శాస్త్రవేత్తల అభిప్రాయం. గ్రహాంతరవాసుల ఉనికికి సంబంధించి కచ్చితమైన ఆధారాలు లేనప్పటికి వారు తప్పక ఉన్నారనే భావిస్తున్నవారు చాలామంది ఉన్నారు.

విశ్వంలో గ్రహాంతరవాసుల ఉనికికి సంబందించి ఎన్నో కథలు, పుస్తకాలు, చలన చిత్రాలు వచ్చాయి. దీంతో గ్రహాంతర వాసుల ఉనికిపై మరింత ఆసక్తి పెరిగింది. అంతరిక్షంలో ఏవైనా తరంగాల వంటివి వెలువడినప్పుడు అవి గ్రహాంతరవాసులు పంపినవేనని అనుకున్న సందర్భాలు ఉన్నాయి. మానవ మేథస్సుకు పరీక్ష పెట్టే ఘటనలు అంతరిక్షంలో చోటు చేసుకున్నప్పుడు ఆ ఘటనల వెనుక ఉన్నది గ్రహాంతరవాసులేనన్నది చాలామంది అభిప్రాయం.

ప్రముఖ బ్రిటీష్ భౌతిక శాస్త్రవేత్త స్టీఫెన్ హాకింగ్ సైతం గ్రహాంతర వాసుల ఉనికి గురించి చెబుతూ గ‌్రహాంత‌ర‌వాసుల సందేశానికి స్పందించ‌డం చాలా ప్రమాద‌క‌ర‌మ‌ని హెచ్చరించారు కూడా. వాళ్లు మ‌నుషుల కంటే ఎంతో అత్యాధునిక టెక్నాల‌జీ క‌లిగి ఉండే అవ‌కాశం ఉంద‌ని అభిప్రాయపడిన హాకింగ్‌.. వారితో మ‌న ప‌రిచ‌యం ప్రమాద‌క‌ర‌మేన‌ని స్పష్టంచేశారు కూడా. మ‌న సందేశాల‌ను స్వీక‌రించే గ్రహాంత‌ర‌వాసులు మ‌న‌కంటే కొన్ని వంద‌ల కోట్ల ఏళ్ల ముందే ఉండొచ్చని ఆయ‌న అన్నారు. మరోవైపు గ్రహాంత‌ర‌వాసులు అన్వేష‌ణ కోసం నైరుతి చైనాలో ప్రపంచంలోనే అతిపెద్ద రేడియో టెలిస్కోప్ను కూడా ఏర్పాటు చేసింది. 30 ఫుట్‌బాల్ మైదానాలంత‌ వైశాల్యంలో ఉన్న అపెర్చర్ స్పెరిక‌ల్ రేడియో టెలిస్కోప్ ద్వారా గ్రహాంతర వాసుల కదలికలను పసిగట్టవచ్చన్నది చైనా ఆలోచన.

గ్రహాంతర వాసుల గురించి ఇంతమంది ఇన్ని రకాలుగా చెబుతున్నప్పటికీ అసలు వాటి ఉనికే తమకు కనిపించలేదని లేదని అంటున్నారు ఆస్ట్రేలియాకు చెందిన పరిశోధకులు. అయితే గ్రహాంతరవాసుల ఉనికి కోసం దశాబ్దాలుగా అంతరిక్షంలోకి కొన్ని సంకేతాలు, గుర్తులు పంపుతున్నా ఇప్పటికీ ఎలాంటి ప్రత్యుత్తరం లేదు. ఈ నేపథ్యంలో వీరు వెల్లడించిన వివరాలు ఆసక్తి కలిగిస్తున్నాయి. వారు చెబుతున్న వివరాల ప్రకారం చూసుకుంటే ఈ విశ్వంలో మనిషి ఒంటరి జీవే. విశ్వంలో దాదాపు 10.3 మిలియన్లు అంటే కోటీ 30 లక్షల నక్షత్రాలు పరిశీలించిన పరిశోధకులు అందులో ఎక్కడా గ్రహాంతర వాసుల ఉనికి సంబంధించిన ఆనవాళ్లు కనిపించలేదని అంటున్నారు.

ఆస్ట్రేలియాకు పశ్చిమాన ఉన్న మురిచ్‌ సన్‌ వైడ్ ఫీల్డ్‌ అరే ఎండబ్ల్యూఏ అనే తక్కువ తరంగ దైర్ఘ్యం కలిగిన రేడియో టెలిస్కోప్‌తో వీరు ఈ నక్షత్రాలను పరిశీలించారు. కాని వాటి వల్ల ఎలాంటి ఫలితాలు రాలేదని అంటున్నారు. విశ్వంలో కాకాపోయినా కనీస సౌర వ్యవస్థకు ఆవల అయినా జీవం ఉనికి ఉంటుందేమో అని శాస్త్రవేత్తలు పరీక్షించి చూసారు. కాని వారికి ఎలాంటి ఆధారాలు దొరకలేదని చెబుతున్నారు. గ్రహాంతరవాసుల టెక్నో సిగ్నేచర్స్‌ అంటే సమాచార సంకేతాల కోసం ఎంతగా ప్రయత్నించినా అవి దొరకలేదని అంటున్నారు. ఎండబ్ల్యూఏ రేడియా టెలిస్కోప్‌ ద్వారా ఎఫ్​ఎం రేడియాకోసం వినియోగించే తరంగాల వంటి వాటి కోసం అన్వేషించారు. ఇవి చాలా తక్కువ తరంగదైర్ఘ్యం కలిగి ఉంటాయి. అయితే వారు పరిశీలించిన నక్షత్రాలనుంచి ఎలాంటి తరంగాలు వెలువడలేదని స్పష్టం చేసారు.

ఈ పరిశీలనలో ఎలాంటి ఫలితాలు రాకపోయినా ఆశ్చర్యం కలిగించలేదని విశ్వంలో మనకు తెలియనివి ఇంకా చాలా ఉన్నాయని అంటున్నారు ఆస్ట్రేలియా నేషనల్ సైన్స్ ఏజెన్సీకి చెందిన పరిశోధకులు. మన సౌర వ్యవస్థకు ఆవల జీవం ఉందా లేదా ఉన్న విషయాన్ని కనుకోవడం సవాళ్లతో కూడుకున్నదని అంటున్నారు. అయితే విశ్వంలో మనం ఒంటరి వారం కాదనే విషయాన్ని నిరూపించడానికి ఎప్పుడు, ఎలా, ఎక్కడ, ఎలాంటి సంకేతాలు వస్తాయో చెప్పలేమని చెబుతున్నారు. అయితే ప్రస్తుతం జరిపిన అన్వేషణ గతంలో చేసిన వాటికంటే వంద రెట్లు విస్తృతమైనదని అంటున్నారు ఈ అన్వేషణలో సానుకూల ఫలితాలు రాకపోవడం వల్ల గ్రహాంతర వాసుల ఉనికిపై సందేహాలు ఏర్పడినట్టు చెబుతున్నారు.

విశ్వంలో కోటి నక్షత్రాలు అంటే పెద్దగా అనిపించకపోవచ్చు. ఎందుకంటే పాలపుంతలో వెయ్యి కోట్ల నక్షత్రాలకు పైనే ఉండొచ్చని అంచనా వేస్తున్నారు. అంటే ఇప్పుడు వీరు చేసిన అన్వేషణ 0.001% పరిమితమయింది. సముద్రాల్లో 30 చేపలు ఉన్నాయనుకుంటే వాటి పరిశీలనకు కేవలం ఈత కొలనుకు సమానమైన ప్రదేశంలో అన్వేషణ జరిపినట్టుగా భావించవచ్చని అంటున్నారు పరిశోధకులు. అయితే భవిష్యత్‌లో తమ అన్వేషణ పరిధిని మరింతగా విస్తరించనున్నట్టు చెబుతున్నారు

అయితే గ్రహాంతర వాసుల ఉనికి సంబంధించి ఇప్పటికీ ఓ స్పష్టత లేని సమయంలో ఆస్ట్రేలియా పరిశోధకులు వెల్లడించిన వివరాలు వాస్తవంగా ఉన్నట్టే కనిపిస్తున్నా భవిష్యత్‌లో జరిగే అన్వేషణలో ద్వారా సరికొత్త విషయాలు ముందుకు వచ్చే అవకాశాలు లేకపోలేదు. అంటే గ్రహాంతర వాసులు మనకన్నా ఎన్నో రెట్లు తెలివైన వారని శాస్త్రవేత్తలు చెబుతున్న విషయాన్ని పరిగణలోకి తీసుకుంటే వారి ఉనికి గుర్తించడం అంత సులువు కాదు అన్న విషయాన్ని కూడా గూర్తించాల్సి ఉంటుంది.

ఇదీ చదవండి: అమెరికా వీడియోల్లో ఉన్నవి ఫ్లయింగ్ సాసర్లేనా?