Jio Bharat phone launch : రూ.999కే అదిరే ఫీచర్లతో ఇంటర్నెట్ ఎనేబుల్డ్ ఫోన్ తీసుకొచ్చేందుకు సిద్ధమైంది రిలయన్స్ జియో. జియోభారత్ V2 4G ఫోన్ పేరుతో కొత్త మొబైల్ను మార్కెట్లోకి విడుదల చేయనుంది. జులై 7 నుంచి 10 లక్షల జియోభారత్ ఫోన్ల బీటా టెస్టింగ్కు సన్నాహాలు చేసింది. మార్కెట్లోనే అత్యంత చౌకైన ఇంటర్నెట్ ఫోన్ ఇదే కానుందని చెబుతోంది రిలయన్స్ జియో.
Jio Bharat Phone Price : ఇతర టెలికాం ఆపరేటర్లతో పోల్చితే జియోభారత్ ప్లాన్స్ కూడా చాలా తక్కువని సోమవారం విడుదల చేసిన ఓ ప్రకటనలో పేర్కొంది రిలయన్స్ జియో. రూ.123కు 28 రోజుల వ్యాలిడిటీతో 14 జీబీ డేటా ఇవ్వనున్నట్లు తెలిపింది. ఇతర ఆపరేటర్లు ఈ తరహా ఫోన్ల కోసం రూపొందించిన ప్లాన్(రూ.179కి 2 జీబీ డేటా)తో పోల్చితే తమ ప్లాన్ ధర 30శాతం తక్కువని, 7 రెట్లు డేటా అధికంగా లభిస్తుందని వెల్లడించింది రిలయన్స్ జియో.
Jio Bharat V2 4G Phone features :
- 1.77 అంగుళాల స్క్రీన్, 0.3మెగాపిక్సెల్ కెమెరా
- ఎస్డీ కార్డ్తో 128జీబీ స్టోరేజ్ సామర్థ్యం
- హెచ్డీ వాయిస్ కాలింగ్, లౌడ్ స్పీకర్
- 1000mAh బ్యాటరీ
- జియో సినిమా, జియో సావన్తో వినోదం!
- యూపీఐ పేమెంట్స్ చేసేందుకు వీలుగా జియోపేజియో భారత్ ఫోన్
'2జీ ముక్త్ భారత్' కలను సాకారం చేయాలన్న సంకల్పంతో ఈ జియోభారత్ మొబైల్ ఫోన్ను తీసుకొస్తున్నట్లు ఓ ప్రకటన ద్వారా సోమవారం వెల్లడించింది రిలయన్స్. "భారత దేశంలో 25కోట్ల మంది వినియోగదారులు ఇప్పటికీ 2జీ శకంలోనే ఉండిపోయారు. ప్రపంచం మొత్తం 5జీ విప్లవానికి సిద్ధమవుతుంటే వారు మాత్రం కనీసం ఇంటర్నెట్కు కూడా నోచుకోవడం లేదు. ప్రజల జీవనోపాధి, ఆర్థిక పరిస్థితిని మెరుగుపరిచేందుకు సాంకేతికత తప్పనిసరి. ఇంటర్నెట్ను ప్రజలందరికీ చేరువ చేసి, సాంకేతికత ఫలాల్ని ప్రతి భారతీయుడికి చేరేలా చేసేందుకు ఉన్న ఏ ఒక్క అవకాశాన్నీ వదిలిపెట్టబోమని ఆరేళ్ల క్రితం జియోను లాంఛ్ చేసినప్పుడు మేము చెప్పాము. సాంకేతికత.. అతి కొద్ది మందికి మాత్రమే పరిమితం కారాదు" అని ఆ ప్రకటనలో పేర్కొన్నారు రిలయన్స్ జియో ఛైర్మన్ ఆకాశ్ అంబానీ.
