ఏటా సెప్టెంబర్-అక్టోబర్లో విడుదలయ్యే ఐఫోన్లపై ప్రజల్లో విపరీతమైన ఆసక్తి ఉంటుంది. కొత్తగా వచ్చే సిరీస్, వాటిల్లో ఫీచర్స్ ఎలా ఉండనున్నాయనే ఉత్కంఠ నెలకొంటుంది. ఈ నేపథ్యంలోనే ఈ ఏడాది విడుదల కానున్న ఐఫోన్ 13 సిరీస్కు (iphone 13) సంబంధించి పలు ఫీచర్లు లీకయ్యాయి.
సెప్టెంబర్ 14న యాన్యువల్ ఫాల్ కార్యక్రమాన్ని నిర్వహించనుంది టెక్ దిగ్గజం యాపిల్. ఈ ఈవెంట్లో విడుదల చేసే వస్తువులపై సంస్థ ఎలాంటి ప్రకటన చేయలేదు. ఆ రోజున ఐఫోన్ 13 మినీ, ఐఫోన్ 13, ఐఫోన్ 13 ప్రో, ఐఫోన్ 13 ప్రో మ్యాక్స్ సహా ఐఫోన్ 13 సిరీస్ స్మార్ట్ఫోన్లను యాపిల్ లాంచ్ చేస్తుందనే ఊహాగానాలు వస్తున్నాయి. వాటి ఫీచర్లు, ధరలపై కొన్ని నివేదికలు ఇలా చెబుతున్నాయి..
ధర (అంచనా)
యాపిల్ హబ్ అనే బ్లాగ్ ప్రకారం ఐఫోన్ 13 సుమారు రూ.58,665 (800 డాలర్ల) లోపు ఉండే అవకాశం ఉంది. సెప్టెంబర్ 24 నుంచి సేల్ ప్రారంభం అవుతుందని అంచనా.
ఐఫోన్ 13 కలర్స్
ఐఫోన్ 13 కలర్స్ గురించిన సమాచారం బహిర్గతం కాలేదు. అయితే నలుపు, తెలుపు, ఆరెంజ్ సహా పలు రకాల్లో అందుబాటులోకి ఉండబోతుందని తెలుస్తోంది.
ఐఫోన్ 13 డిస్ప్లే
ఫేస్ ఐడీ 2.0, అతి చిన్న నాచ్తో 6.1 ఇంచ్ ఓలెడ్ డిస్ప్లే ఉంటుందని అంచనా.
ఐఫోన్ 13 ప్రాసెసర్ వివరాలు
64జీబీ, 128జీబీ, 256జీబీ స్టోరేజీ స్పేస్తో ఏ15 బయోనిక్ సిస్టం-ఆన్-చిప్ ప్రాసెసర్తో రానుందని నివేదిక చెబుతోంది.
ఐఫోన్ 13 కెమెరా
వెనుకవైపు డయాగ్నోనల్గా డ్యుయల్ కెమెరాతో ఐఫోన్ 13 వస్తుందని అంచనా. అందులో ఎఫ్/1.8 అల్ట్రా వైడ్ యాంగిల్ లెన్స్ ఉండనున్నాయి. ఈ సిరీస్ ఆస్ట్రోఫొటోగ్రఫీ మోడ్తో రాబోతుందని తెలుస్తోంది.
ఐఫోన్ 13 బ్యాటరీ, కనెక్టివిటీ వివరాలు
వైఫై 6ఈ, మెరుగైన 5జీ కనెక్టివిటీతో ఐఫోన్ 13 రానుందని సమాచారం. 24వాట్స్ ఫాస్ట్ ఛార్జింగ్ సాంకేతిక సపోర్ట్తో 3,095ఎంఏహెచ్ సామర్థ్యం గల బ్యాటరీ ఉంటుందని తెలుస్తోంది.
ఇదీ చూడండి: Iphone 13: సిగ్నల్ లేకపోయినా ఫోన్కాల్ చేసుకోవచ్చు!
