కరోనా బాధిత భర్త నుంచి సేకరించిన వీర్యాన్ని ఐవీఎఫ్ విధానం కోసం వినియోగించడానికి అతని భార్యకు అనుమతించింది గుజరాత్ హైకోర్టు. దీంతో కొవిడ్తో దూరమైన భర్త ద్వారానే తల్లి కావాలనుకున్న ఆ మహిళ కల నెరవేరే అవకాశం లభించినట్లయింది.
అసలేమైంది?
వడోదరాలోని స్టెర్లింగ్ ఆస్పత్రిలో కొవిడ్తో చికిత్స పొందుతున్న తన భర్త నుంచి సేకరించిన వీర్యం ద్వారా ఐవీఎఫ్ విధానంలో తల్లి కావాలని ఇటీవలే ఓ మహిళ ఆశించింది. అందుకు ఆస్పత్రి వైద్యులు నిరాకరించగా.. ఆమె గుజరాత్ హైకోర్టును ఆశ్రయించారు. మహిళ పిటిషన్పై జులై 20న విచారణ జరిపిన న్యాయస్థానం.. సదరు కొవిడ్ బాధితుని నుంచి వీర్యాన్ని తక్షణమే సేకరించాలని ఆస్పత్రిని నిర్దేశించింది. కాగా, అదే రోజున వైద్యులు దానిని సేకరించారు. ఆ మరుసటి రోజే ఆమె భర్త చనిపోయారు.
ఆ సమయంలో దానిని వినియోగించడానికి అనుమతించని హైకోర్టు.. తదుపరి ఆదేశాలు ఇచ్చే వరకు దానిని తగిన విధంగా భద్రపరచాలని సూచించింది. ఈ వ్యవహారంపై ఓ బిల్లు పార్లమెంటులో పెండింగ్లో ఉంది.
ఐవీఎఫ్తో తల్లి కావాలనే ఆమె కోరికకు అత్తింటివారు కూడా ఎలాంటి అభ్యంతరం తెలపలేదు. ఈ నేపథ్యంలోనే దీనిపై మరోసారి విచారణ జరిపిన హైకోర్టు.. వీర్యాన్ని వినియోగించడానికి మహిళకు అనుమతించింది.
ఇదీ చూడండి: కుమారుడి ప్రాణాల కోసం మరో బిడ్డకు జన్మ
