దేశంలో డిజిటల్ వినియోగం పెరుగుతోంది. కరోనా వల్ల గతేడాది భౌతికంగా నగదు చెల్లింపులు.. తగ్గి డిజిటల్ చెల్లింపులు భారీగా పెరిగాయి. లాక్డౌన్ సమయంలోనైతే ఇవి మరీ ఎక్కువగా ఉన్నాయి. బిల్లులు చెల్లించేందుకు, వస్తువుల కొనుగోలుకు చాలా మంది ఆన్లైన్ ద్వారానే చెల్లింపులు జరిపారు.
మహమ్మారి వల్ల డిజిటల్ వేదికల వినియోగం వేగవంతమైంది. అదే విధంగా సైబర్ మోసాలు కూడా పెరిగిపోయాయి. డిజిటల్ పద్ధతిలో చెల్లింపులు చేసేటప్పుడు పూర్తి అప్రమత్తతతో ఉండాలి. సురక్షితమైన వేదికలను మాత్రమే ఉపయోగించుకోవాలి. ఎప్పుడూ డిజిటల్ చెల్లింపులు చేసే వారైనా లేదా కొత్తగా డిజిటల్ చెల్లింపులు చేస్తున్నా.. ప్రతి సారి ఆన్లైన్ చెల్లింపులు సురక్షితంగా ఉండేలా చూసుకోవాలి.
ఉచిత వైఫైతో జాగ్రత్త..
రెస్టారెంట్లు, బస్ స్టాండ్లు, హోటళ్లు రైల్వే స్టేషన్లు, విమానాశ్రయాలు.. ఇలా జనాలు ఎక్కువగా ఉండే ప్రాంతాల్లో ప్రస్తుతం ఉచిత వైఫై సౌకర్యం లభిస్తోంది. మొబైల్నెట్వర్క్ లేకపోవటం వల్ల, వేగంగా ఇంటర్నెట్ లభిస్తుందనే కారణాలతో చాలా మంది వీటికి కనెక్ట్ చేసుకుని వాడుతుంటారు.
అయితే పబ్లిక్ వైఫైలో సెక్యూరిటీ అంతగా ఉండదని విశ్లేషకులు అభిప్రాయపడుతున్నారు. దీనివల్ల హ్యాకర్స్కి ఇవి లక్ష్యాలుగా మారుతుంటాయని వారు చెబుతున్నారు. ఈ కారణంగా పబ్లిక్ వైఫై వాడితే.. ఎలాంటి లావాదేవీలు జరపకపోవడమే ఉత్తమమని సూచిస్తున్నారు. కచ్చితంగా వాడల్సి వస్తే మాత్రం వీపీఎన్ ఉపయోగించడం కాస్త సురక్షితమంటున్నారు.
క్లిష్టమైన పాస్వర్డ్, ఓటీపీ..
పాస్వర్ట్ ఖచ్చితంగా క్లిష్టంగా ఉండేలా చూసుకోవాలని సైబర్ నిపుణులు సూచిస్తున్నారు. ఇంట్లోని వై-ఫై విషయంలో కూడా ఇతరులు కనుక్కోలేనంత క్లిష్టంగా పాస్వర్డ్ పెట్టుకోవాలంటున్నారు.
ఆన్లైన్ చెల్లింపుల విషయంలో పాస్వర్డ్ బదులు వన్టైమ్ పాస్వర్డ్ ఉపయోగించుకోవటం వల్ల సెక్యూరిటీ పెరుగుతుందని సూచిస్తున్నారు సైబర్ నిపుణులు. వన్టైమ్ పాస్వర్డ్లు ఒకే సారి ఉపయోగపడే విధంగా ఉండటం సహా రిజిస్టరైన మొబైల్ ద్వారా వాటిని పొందవచ్చు. అయితే పాస్వర్డ్ లు, ఓటీపీలను ఇతరులతో పంచుకోకూడదు. ఒకవేళ వేరే వాళ్లతో పంచుకున్నట్లయితే మోసాల బారిన పడేందుకు అవకాశాలు ఎక్కువ.
ఇప్పుడు కొనుగోలు.. తర్వాత చెల్లింపు
ఆన్లైన్ షాపింగ్లో క్రెడిట్ కార్డు ద్వారా చెల్లింపులు జరపటం సర్వ సాధారమైంది. అయితే ఈ మధ్య కొనుగోలు చేసేందుకు వీలుగా తర్వాత చెల్లించే ఆప్షన్ అందుబాటులోకి వస్తోంది. ఇందులో వస్తువులు ఇప్పుడు కొనుగోలు చేసి.. కొన్ని రోజుల తర్వాత చెల్లించవచ్చు. దీనివల్ల బ్యాంకు ఖాతా వివరాలు వెల్లడించాల్సిన అవసరం ఉండదు. ఇందులో థార్డ్పార్టీ పేమెంట్ గేట్వేల అవసరం ఉండదు కాబట్టి సెక్యూరిటీ చాలా ఎక్కువగా ఉంటుంది.
అనుమానాస్పద సైట్లను ఉపయోగించవద్దు.
ఇంటర్నెట్లో బ్రౌజింగ్ చేస్తున్నప్పుడు ఆకట్టుకునే విధంగా ఉన్న సైట్లకు సంబంధించిన వైబ్సైట్లు పాపప్ల ద్వారా తెరుచుకుంటుంటాయి. ఈ సైట్లలో పేమెంట్స్ చేయటం ద్వారా సైబర్ నేరగాళ్ల వలలో చిక్కుకునే ప్రమాదం ఉంది. కంప్యూటర్ కూడా వైరస్ బారిన పడవచ్చు. అంతేకాకుండా వ్యక్తిగత సున్నితమైన సమాచారం తస్కరణకు గురయ్యే అవకాశాలు ఎక్కువగా ఉంటాయి. డేటా భద్రంగా ఉండాలంటే సురక్షితమైన, విశ్వసనీయమైన వైబ్సైట్లు, పేమెంట్ గేట్ వేలను మాత్రమే ఉపయోగించాలి.
సెక్యూరిటీ..
ఏదైనా వెబ్పేజీ సురక్షితమో కాదో ఆ వెబ్పేజీ అడ్రస్ ద్వారా తెలుసుకోవచ్చు. ఒక వైబ్సైట్ అడ్రస్లో హెచ్టీటీపీఎస్ అని ఉంటే అది సురక్షితం అన్నట్లు. హెచ్టీటీపీఎస్ లేని వైబ్సైట్లు సెక్యూరిటీ తక్కువ ఉంటుంది. వెరిఫై కానీ లింక్ల ద్వారా బ్యాంక్ అకౌంట్ల సమాచారం ఇవ్వటం, చెల్లింపులు చేయటం ద్వారా స్పై వేర్ కంప్యూటర్ లోకి చొరబడే ప్రమాదం ఉంటుంది.
వెబ్సైట్ అడ్రస్ పక్కకు తాళం సింబల్ ఉందా? లేదా? అనేది చూసుకోవాలి. వెబ్సైట్ డేటా ఎన్క్రిప్షన్ కోసం ఎస్ఎస్ఎల్ లేదా టీఎల్ఎస్ ఉపయోగించుకుంటుందనేది ఈ రెండింటి ద్వారా తెలుసుకోవచ్చు.
ఇదీ చదవండి:ఎన్నికల తర్వాత భారీ స్థాయిలో పెట్రో బాదుడు?
