Facebook Friend Request Bug : సోషల్ నెట్వర్కింగ్ యాప్ ఫేస్బుక్లో మరో సెక్యూరిటీ లోపం తలెత్తింది. యూజర్లు ఏదైనా ప్రొఫైల్ను ఓపెన్ చేస్తే వారికి ఆటోమెటిక్గా ఫ్రెండ్ రిక్వెస్ట్ వెళ్లిపోతోంది. ఈ లోపాన్ని స్వయంగా గుర్తించిన ఫేస్బుక్.. దీనిపై వినియోగదారులకు క్షమాపణలు చెప్పింది. ఇటీవలి అప్డేట్లో ఈ లోపం ఏర్పడినట్లు తెలిపింది.
ఈ సమస్య గతవారం వెలుగులోకి వచ్చింది. యూజర్లు ఓపెన్ చేసిన ప్రతి ప్రొఫైల్కు ఫ్రెండ్ రిక్వెస్ట్ వెళ్లిపోయింది. దీనిపై అనేక మంది సోషల్ మీడియా వేదికగా ఫిర్యాదులు చేశారు. తమ అనుమతి లేకుండా ఫ్రెండ్ రిక్వెస్ట్లు వెళ్లడంపై ఆగ్రహం వ్యక్తం చేశారు. దీంతో మెటా వెంటనే స్పందించింది. సమస్యను గుర్తించి.. చర్యలు చేపట్టింది. యాప్ అప్డేట్ తర్వాత ఈ సెక్యూరిటీ లోపం తలెత్తినట్లు వెల్లడించింది. సమస్యను పరిష్కరించినట్లు స్పష్టం చేసింది.
"ఇటీవలి యాప్ అప్డేట్లో బగ్ గుర్తించాం. దీని వల్ల పొరపాటున ఫ్రెండ్ రిక్వెస్ట్లు వెళ్లాయి. దీంతో కొంతమంది యూజర్లకు ఇబ్బందులు తలెత్తాయి. అందుకు క్షమాపణల కోరుతున్నాం. ఈ బగ్ను సరిచేశాం."
-మెటా ప్రతినిధి
మరోవైపు, ఫేస్బుక్ను ఉపయోగించి పలువురు స్కామ్లకు పాల్పడుతున్నారు. అమాయకులను లక్ష్యంగా చేసుకొని సైబర్ దాడులు చేస్తున్నారు. ఫేస్బుక్ పేజీల ద్వారా యూజర్ల సిస్టమ్లలోకి మాల్వేర్ను వ్యాప్తి చేస్తున్నారు. ఈ ఏడాది మార్చిలో ఈ స్కామ్ బయటపడింది. నకిలీ చాట్జీపీటీ పేజీలను సృష్టించి.. వాటిని మాల్వేర్ వ్యాప్తి చేసేందుకు ఉపయోగిస్తున్నట్లు క్లౌడ్ ఎస్ఈకే అనే రీసెర్చ్ టీమ్ గుర్తించింది. యూజర్ నేమ్లను సైతం మార్చేసి నెటిజన్లను ఏమార్చుతున్నారని వెల్లడించింది. అనంతరం, ఫేస్బుక్ పేజీలలో యాడ్స్ ప్లే చేస్తున్నారు. లేటెస్ట్ 'చాట్జీపీటీ వెర్షన్', 'జీపీటీ-వీ4' పేర్లతో లింకులు ఏర్పాటు చేస్తున్నారు. యూజర్ల ఆ లింక్లపై క్లిక్ చేస్తే.. సిస్టమ్లలోకి మాల్వేర్ చొరబడుతోంది. ఇది యూజర్ల సెక్యూరిటీకి భంగం కలిగిస్తోందని క్లౌడ్ ఎస్ఈకే తెలిపింది.
మే నెల మొదట్లో మెసేంజర్లోనూ సాంకేతిక సమస్యలు వచ్చాయి. ఆటోమెటిక్గా ఫొటోలు డిలీట్ అయ్యాయి. గ్రూప్ చాట్లు, డైరెక్ట్ మెసేజ్లలో పంపించుకునే ఫైళ్లు, లింకులు సైతం వాటికవే డిలీట్ అయిపోయాయి. మెసేంజర్ హిస్టరీ సైతం డిలీట్ అయిపోయింది. తమ ఖాతాలు ఓపెన్ చేసేందుకూ కొందరు ఇబ్బంది పడ్డారు. ప్రధానంగా ఫిలిప్పీన్స్లో ఉండేవారికి ఈ సమస్య అధికంగా కనిపించింది. బ్రెజిల్లోని కొందరు యూజర్లకు సైతం ఈ ఇబ్బంది ఎదురైంది.
