సైబర్ నేరగాళ్లు పూటపూటకూ పంథా మారుస్తున్నారు. జేబులు చిల్లు చేసేందుకు అన్ని మార్గాలను వెతుకుతున్నారు. ఇందుకు సంబంధించి తాజాగా మరో స్కామ్ బయటపడింది. ఈ నేపథ్యంలో ప్రజలు జాగ్రత్తగా ఉండాలని సీఈఆర్టీ-ఐఎన్(కంప్యూటర్ ఎమర్జెన్సీ రెస్పాన్స్ టీమ్-ఇండియా) హెచ్చరించింది(cert-in advisory). భారతీయ బ్యాంకింగ్ వినియోగదారులే లక్ష్యంగా ఈ సైబర్ దాడులు జరుగుతున్నట్టు పేర్కొంది.
సైబర్ నేరగాళ్లు ఈసారి ఎన్గ్రాక్ వేదికను ఉపయోగించుకుని ఫిషింగ్ దాడులకు(phishing attack) పాల్పడుతున్నారు. తమని తాము బ్యాంకింగ్ అధికారులుగా పరిచయం చేసుకుని వినియోగదారులను మోసం చేస్తున్నారు. ఇంటర్నెట్ బ్యాంకింగ్ వివరాలు, ఓటీపీ, ఫోన్నెంబర్ వంటి అత్యంత గోప్యతతో కూడిన విషయాలను అడిగి తెలుసుకుంటున్నారు.
"ఎన్గ్రాక్ వేదికగా.. భారతీయ బ్యాంకింగ్ కస్టమర్లపై సైబర్ నేరగాళ్లు ఫిషింగ్ దాడులకు పాల్పడుతున్నారు. ఇంటర్నెట్ బ్యాంకింగ్ పోర్టళ్ల తరహాలో కొన్ని వెబ్సైట్లను రూపొందిస్తున్నారు. వీటిని ఉపయోగించుకుని కస్టమర్ల దగ్గర నుంచి అత్యంత గోప్యమైన వివరాలను సేకరిస్తున్నారు. ప్రజలు జాగ్రత్తగా ఉండాలి" అని సీఈఆర్టీ సూచించింది.
ఎలా చేస్తారు?
వినియోగదారులకు.. ఫిషింగ్ లింక్స్(చివర్లో ngrok.io. అని ఉంటుంది)తో కూడిన మెసేజ్ వెళుతుంది. 'ప్రియమైన వినియోగదారులారా.. మీరు మీ కేవైసీని అప్డేట్ చేసుకోలేదు. చేసుకోకపోతే మీ XXX బ్యాంకు ఖాతా సస్పెండ్ అవుతుంది. వెంటనే కేవైసీని అప్డేట్ చేసుకోండి. అందుకోసం ఈ లింక్ను క్లిక్ చేయండి" అని మెసేజ్లో ఉంటుంది. ఇలాంటి మెసేజ్లు చూసి వినియోగదారులు ఆందోళన చెందడం సహజం. ఎవరి నుంచి వచ్చిందో కూడా చూడకుండా లింక్ క్లిక్ చేస్తూ ఉంటారు. ఖాతా నిజంగానే సస్పెండ్ అవుతుందేమో అనుకుని భయపడుతూ ఉంటారు.
యూఆర్ఎల్ మీద క్లిక్ చేసినప్పుడు.. ఇంటర్నెట్ బ్యాంకింగ్ సైట్ను పోలి ఉన్న ఫిషింగ్ వెబ్సైట్ ఓపెన్ అవుతుంది. వినియోగదారుల లాగిన్ వివరాలు అడుగుతుంది. ఓటీపీ కూడా ఫోన్కు వెళుతుంది. వినియోగదారుడు ఆ ఓటీపీని వెబ్సైట్లో పెడతాడు. ఇక్కడే సైబర్ నేరగాళ్లకు చిక్కుతాడు. నేరగాళ్లు అక్రమ లావాదేవీలకు పాల్పడతారు.
ఇలాంటి మెసేజ్లు, ఈ-మెయిళ్లతో జాగ్రత్తగా ఉండాలని సీఈఆర్టీ-ఇన్ సూచించింది. ఈ క్రమంలో నిజమైన బ్యాంకుల నుంచి వచ్చే మెసేజ్లు, ఫిషింగ్ దాడుల్లో వచ్చే మెసేజ్ల మధ్య ఉన్న తేడాలను వివరించింది.
- సాధారణంగా బ్యాంకులు పంపే మెసేజ్లలో సెండర్ ఐడీ ఉంటుంది. అయితే ఈ సైబర్ నేరగాళ్లు పంపే మెసేజ్లలో ఐడీ కాకుండా ఓ ఫోన్ నెంబర్ ఉంటుంది.
- రెండు మెసేజ్లలో వాడే భాషను కూడా గమనించాలి. సైబర్ నేరగాళ్లు పంపే మెసేజ్లలో వ్యాకరణ దోషాలు ఉంటాయి. అసలు ఫార్మాట్ కూడా సరిగ్గా ఉండదు. ఇలాంటి మెసేజ్లు ఏ బ్యాంకు కూడా పంపదు.
- ఈ మెయిల్స్ ఓపెన్ చేసేడప్పుడు జాగ్రత్తగా ఉండాలి. ఏదైనా అనుమానాస్పదంగా అనిపిస్తే బ్యాంకుకు వెంటనే ఫోన్ చేయండి.
ఇదీ చూడండి:- ఈ ఏడు టిప్స్తో మీ నెట్ బ్యాంకింగ్ సేఫ్!
