ఈ పెంగ్విన్ ఓదారుస్తుంది!
వైజా... ఓ మొబైల్‌ ఆప్‌. మీరు ఇందులోకి వెళ్లగానే ఓ చిట్టి పెంగ్విన్ పలకరిస్తుంది. దాంతో మీరు చాట్‌ చేయొచ్చూ నేరుగానూ మాట్లాడొచ్చూ. ఇది మీ సమస్య ఏదైనా సరే ఓపిగ్గా వింటుంది. మీ భయాందోళనలూ, ఆవేదనల నుంచి ఎలా బయటపడగలరో చెబుతుంది. సాధారణంగా మనం మానసికంగా ఇబ్బందులు పడుతున్నప్పుడు సైకాలజిస్టులు కాగ్నిటివ్‌ బిహేవియర్‌ థెరపీ(సీబీటీ), మెడిటేషన్‌, మైండ్‌ఫుల్‌నెస్‌ వంటి చికిత్సా పద్ధతుల్ని వాడతారు. వైజా ఆప్‌లోని ఈ పెంగ్విన్ కూడా వీటిని ఉపయోగిస్తూనే మీకు మానసిక సాంత్వననిస్తుంది. అవసరాన్నిబట్టి మిమ్మల్ని నిద్రపుచ్చే కథలు చెబుతుంది... ధ్యానం కూడా నేర్పిస్తుంది.
ఈ పెంగ్విన్ ఓ చాట్‌బోటే కానీ... దాన్ని ఒట్టి మెషిన్‌ అని కొట్టిపారేయలేం. దాదాపు రెండువేలమంది మానసిక బాధితుల సమస్యలూ, దానికి నిపుణులిచ్చే సూచనల ఆధారంగా దీన్ని డిజైన్‌ చేశారు. అందుకే, ఈ పెంగ్విన్‌తో జరిపే సంభాషణ ఎక్కడా యాంత్రికంగా అనిపించదు. ఆప్‌లోని పెంగ్విన్‌తో చాట్‌ వద్దనుకుంటే నేరుగా సైకాలజిస్టులతోనూ మీరు మాట్లాడొచ్చు. అందుకోసం రూ.399 చెల్లించి ఇందులో సభ్యులుగా చేరాల్సి ఉంటుంది. ప్రపంచవ్యాప్తంగా 30 లక్షలమంది దీన్ని వాడుతున్నారు. ఆరోగ్య సమస్యలకి సంబంధించిన ఆప్‌లకి ప్రపంచస్థాయిలో రేటింగ్‌ ఇచ్చే ‘ఓర్చా’ సంస్థ దీన్ని ది బెస్ట్‌ ఆప్‌గా ప్రకటించింది. ప్రవాసాంధ్ర దంపతులు రవికాంత్‌ వెంపటి, జో అగర్వాల్‌లు ఓ స్టార్టప్‌గా 2015లో దీన్ని ప్రారంభించారు. ఇటీవలే, గూగుల్‌ సంస్థ కూడా ఇందులో పెట్టుబడులు పెట్టింది.
నేరుగా నిపుణులతోనే...
కరోనా ఉధృతితో మన దేశంలో బాగా ప్రాచుర్యం సాధించిన వెబ్‌సైట్‌ ‘మైండ్ పియర్స్’. యాంగ్జైటీ, డిప్రెషన్‌, స్ట్రెస్‌, ఓసీడీ, ఆల్కహాలిజం... ఇలా తొమ్మిది రకాలైన సమస్యలు ఇందులో పట్టికలా ఉంటాయి. వీటిల్లో మీ సమస్యేమిటో చెబితే అందుకు తగ్గ పరిష్కారం క్లుప్తంగా వివరిస్తుంది ఈ వెబ్‌సైట్‌. సాధారణస్థాయిలో ఈ సలహాలు సరిపోతాయి. తీవ్రత మరీ ఎక్కువగా ఉంటే అప్పటికప్పుడే మిమ్మల్ని నిపుణులతో వీడియోలోనూ, ఫోన్‌ ద్వారానూ కనెక్ట్‌ చేస్తుంది. ఇందుకోసం రూ.300 తీసుకుంటుందీ సంస్థ.
మామూలుగా సైకాలజిస్టులు మన సమస్యల నివారణకి రోజువారీ చేయాల్సిన కొన్ని పనులు చెప్పి, వాటిపైన డైరీ రాయమంటారు. ఈ వెబ్‌సైట్‌ని మనం అలా ఆన్‌లైన్‌ డైరీగానూ వాడుకోవచ్చు. 28 ఏళ్ల కనికా అగర్వాల్‌ దీని సృష్టికర్త. సింగపూర్‌లో పారిశ్రామికవేత్తగా ఉంటూ వచ్చిన కనికకి రెండేళ్లకిందట గుండెపోటు వచ్చి ఆసుపత్రికి వెళితే... అది హృద్రోగం కాదనీ, ‘పానిక్‌ యాంగ్జైటీ అటాక్‌’ అనీ తేల్చిన వైద్యులు సైకాలజిస్టుల్ని కలవమన్నారట. సింగపూర్‌ నుంచే ఆన్‌లైన్‌ ద్వారా భారతీయ సైకాలజిస్టులతో మాట్లాడదామంటే ఇబ్బందులొచ్చాయట. అలాంటి సమస్యలని నివారించడానికే మైండ్ పియర్స్‌ని స్థాపించానంటోంది కనిక. 2020 జనవరిలో మొదలైన ఈ వెబ్‌సైట్‌కి వినియోగదారుల రాక కరోనా లాక్‌డౌన్‌ తర్వాత 145 శాతం పెరిగిందట.
యువత కోసం...
ఇరవైయేళ్ల తరుణ్‌ సాయిది హైదరాబాద్‌. ఒకప్పుడు ఐఐటీలో సీటు సాధించడం తన కల. ఎనిమిదో తరగతి నుంచే ఇందుకోసం రోజుకి 15 గంటలు శ్రమించాడట. అంత ప్రయాసా వృధా అయి అతను ఐఐటీలో సీటు తెచ్చుకోలేకపోయాడు. ఆ డిప్రెషన్‌తో మూడునెలలపాటు కుంగిపోయి ఓ రోజు ఆత్మహత్య చేసుకోవాలనుకున్నాడు. హాస్టల్‌ బిల్డింగ్‌పై నుంచి దూకుదామని వెళుతుండగా... మరో అంతస్తు నుంచి ఇంకెవరో అబ్బాయి అలాగే దూకి చనిపోయాడట. ఆ సంఘటన తన కళ్లు తెరిపించిందంటాడు తరుణ్‌. ఆ తర్వాత ఎన్‌ఐటీ-అగర్తలలో చేరి ఈ మధ్యే బీటెక్‌ ముగించాడు.
ఆత్మహత్య సంఘటన వెంటాడుతూ ఉండటంతో యువతలోని డిప్రెషన్‌ని తగ్గించేలా ‘ఫైండ్ హోప్’ అనే వెబ్‌సైట్‌-కమ్‌-ఆప్‌ని రూపొందించాడు. ఇందులో ఎవరైనా తమ పేరూ ఫోన్‌ నంబరూ నమోదుచేసుకుంటే చాలు... రెండుగంటల్లోనే కౌన్సెలర్‌ల నుంచి కాల్‌ వస్తుంది. సుమారు నెలపాటు మీకు కావాల్సిన చికిత్సని పొందవచ్చు. ఇందులో ప్రధానంగా సైకియాట్రీలో ఎండీ, సైకాలజీలో ఎంఏ చదువుతున్నవాళ్లే కౌన్సెలర్‌లుగా ఉంటారు. వాళ్లు మీ కాలేజీ ఫ్రెండ్స్‌లాగే మీతో మాట్లాడి మీ బాధ్యత తీసుకుంటారు. అవసరాన్నిబట్టి ప్రధాన సైకాలజిస్టులకి రిఫర్‌చేసి మాట్లాడిస్తారు. ఈ యాప్ యువతే లక్ష్యంగా ఉచితంగానే పనిచేస్తోంది. గత రెండు నెలల్లోనే మూడువేలమంది యువత సమస్యల్ని తీర్చిందట ఫైండ్ హోప్!
- ఇదీ చదవండి : టీకా సమయంలో ఎలాంటి ఆహారం తీసుకోవాలి?
