Amazon alexa: అమెజాన్ అలెక్సా మనం ఏ ప్రశ్న అడిగినా టక్కున సమాధానం చెబుతుంది. గగుర్పాటుకు గురి చేసే విషయాలు చెప్పగల సామర్థ్యం కూడా దాని సొంతం. అయితే ఓ పదేళ్ల బాలిక విసిరిన ఛాలెంజ్కు అమెజాన్ అలెక్సా ఇచ్చిన సమాధానం ఇప్పుడు ఆందోళన కల్గిస్తోంది. ఇది చాలా ప్రమాదకరం కావడమే ఇందుకు కారణం. క్రిస్టిన్ లివ్దాల్ అనే మహిళ ఈ విషయాన్ని ట్విట్టర్ ద్వారా వెల్లడించి భయాందోళన వ్యక్తం చేసింది.
ఏం జరిగిందంటే..
క్రిస్టిన్ చెప్పిన వివరాల ప్రకారం.. ఆమె 10 ఏళ్ల కూతురు అలెక్సాను ఛాలెంజ్ అడిగింది. అందుకు అది ' ఫోన్ ఛార్జర్ సగ భాగాన్ని సాకెట్లో పెట్టి బయట మిగిలిన ప్లగ్ మొనలను నాణెంతో టచ్ చెయ్' అని బదులిచ్చింది. ఈ సమాధానం విన్న క్రిస్టిన్ షాక్కు గురైంది. అలా చేస్తే మంటలు చెలరేగుతాయని, షాక్ కొట్టే ప్రమాదం కూడా ఉందని ఆందోళన వ్యక్తం చేసింది. ఆ సమయంలో తాను కూతురి పక్కనే ఉన్నాను కాబట్టి సరిపోయిందని, లేకపోతే ఏం జరిగి ఉండేదో అని వాపోయింది.
క్రిస్టిన్ ట్వీట్తో అమెజాన్ అలెక్సా పనితీరుపై సామాజిక మాధ్యమాల్లో పెద్ద ఎత్తున చర్చ మొదలైంది. 2020లో టిక్టాక్ ఔట్లెట్ ఛాలెంజ్లాగే ఇది కూడా డేంజర్గా ఉందని మాషబుల్ వార్తా సంస్థ తెలిపింది. అసలు అలెక్సాలో ఇలాంటి విషయం ఎలా వచ్చిందని అనుమానం వ్యక్తం చేసింది.
క్రిస్టిన్ ట్వీట్పై అమెజాన్ కూడా స్పందించింది. అలెక్సా తన సమాచారాన్ని కంపెనీ క్లౌడ్ నుంచి పొందుతుందని పేర్కొంది. అయితే వివరాలు అస్పష్టంగా ఉన్నాయని చెప్పింది. ఈ విషయంపై స్పష్టత కోరిన మాషబుల్ సంస్థకూ అమెజాన్ బదులిచ్చింది. కరెంట్ సాకెట్ ఛాలెంజ్కు సంబంధించిన రెస్పాన్స్ను అలెక్సా నుంచి తొలగించినట్లు తెలిపింది. కస్టమర్ల విశ్వాసమే తమకు అత్యంత ముఖ్యమని, వారికి కచ్చితమైన, సంబంధిత, ఉపయోగకర సమాచారాన్ని అందించడానికే అలెక్సాను రూపొందించామని స్పష్టం చేసింది. లోపాన్ని గుర్తించిన వెంటనే దానిని పరిష్కరించడానికి వేగంగా చర్య తీసుకున్నట్లు పేర్కొంది.
ఇదీ చదవండి: శాస్త్రరంగంలో ఈ ఏడాది 'అద్భుత విజయాలు' ఇవే..
