ఉప్మా రుచిగా ఉండాలంటే ఇలా ట్రై చేయండి!

ఉప్మా.. దక్షిణాది రాష్ట్రాల్లో ఇది తెలియని వారు ఉండరు. ఇంకా చెప్పాలి అంటే ఉప్మాపెసరట్టు అంటే.. ఆహా.. ఏమి రుచి అని అంటారు. అలాంటి ఉప్మా చాలా మందికి రుచించదు. అయితే అది తయారు చేసే విధానంపై రుచి ఆధారపడి ఉంటుంది. అసలు మంచి టేస్టీగా ఉండే ఉప్మాని ఎలా తయారు చేయాలో చూద్దాం.

అదిరిపోయే టేస్టు ఉండే ఉప్మాను తయారు చేయడానికి ఏం ఏం కావాలో? ఎలా తయారు చేయాలో చూద్దాం.

• ఉప్మా రుచిగా రావాలంటే నాణ్యమైన ఉప్మారవ్వను ఎంచుకోవాలి.
• రవ్వను ముందుగా దోరగా వేయించుకోవాలి. ఇలా చేస్తే కమ్మటి వాసనతో పాటు ఉప్మా ముద్దలా కాకుండా పొడి పొడిగా వస్తుంది.
• నూనెతో కాకుండా ఆవు నెయ్యితో చేసుకుంటే రుచి, ఆరోగ్యం రెండూ వస్తాయి.
• ఈ అల్పాహారంలో ఉల్లిపాయలు ఎక్కువగా వేయకూడదు. అసలు వేయకుండా చేసిన ఉప్మా చాలా రుచిగా ఉంటుంది.
• దీని తయారీకి వాడే కడాయి/గిన్నె అడుగు భాగం చాలా మందంగా ఉండాలి. పలుచగా ఉంటే త్వరగా అడుగంటుతుంది.
• మరిగే నీళ్లలో కొద్దికొద్దిగా రవ్వ పోస్తూ ఉండలు కట్టకుండా కలపాలి.
• పిల్లలు ఇష్టంగా తినాలంటే ఇందులో జీడిపప్పు, వేరుసెనగపప్పులు వేసుకోవాలి. బీన్స్‌, క్యారెట్‌, పనీర్‌, కొత్తిమీరా, బఠానీలను తాలింపులో వేస్తే రుచి పెరుగుతుంది. ఆరోగ్యానికి చాలా మంచిది కూడా.
• ఈ టిఫిన్‌ను వేడివేడిగా ఉన్నప్పుడే తినేయాలి. అప్పుడే రుచిగా ఉంటుంది. టేస్ట్‌ పెరగడానికి నీళ్లలో ఉప్పుతోపాటు కాస్తంత పంచదార కూడా కలుపుతుంటారు కొందరు. సన్నగా తురిమిన అల్లం ముక్కలను వేసుకుంటే ప్రత్యేకమైన రుచి వస్తుంది.
• పల్లీలను ముందుగా నూనెలో వేయించి పక్కన పెట్టుకోవాలి. ఉప్మా అంతా తయారైన తర్వాత చివరగా వేసుకుంటే కరకరలాడుతూ రుచిగా ఉంటాయి.
• చిన్నారులు ఉప్మాను ఇష్టపడాలంటే ఉప్మా తయారైన తర్వాత కాజూ, పల్లీలు, సేవ్‌, కొత్తిమీర తరుగుతో గార్నిష్‌ చేసి పెడితే ఇష్టంగా తింటారు.
• వడ్డించడానికి ముందు చెంచా నిమ్మరసం కలిపితే మరింత రుచి పెరుగుతుంది. అలాగే చెంచా నెయ్యిని కూడా జోడిస్తే అదనపు రుచి మీ సొంతమవుతుంది.

ఇదీ చూడండి: 'బ్రెడ్‌ ఉప్మా' ఓసారి ట్రై చేయాల్సిందే సుమా!