కూల్​ కూల్​ వేళ హాట్​ 'టర్కిష్​ సూప్' చేయండిలా...

వాతావరణం చల్లగా మారితే చాలు.. వేడి వేడి ఆహారంపై మనసు లాగుతుంది. కడుపారా ఏదైనా తింటే బాగుండు అనిపిస్తుంది.కానీ, ఆకలేసింది కదా అని ఏది పడితే అది తింటే బరువు పెరిగిపోతామని భయం. అలాంటి వారు ఎంచక్కా ఈ టర్కిష్​ సూప్​ ఓ సారి ట్రై చేయండి..

చల్లని వేళ... వేడివేడిగా సూప్ తాగితే కడుపుతో పాటు మనసూ నిండిపోతుంది. అందుకే శాకాహారులు ఎంతో ఇష్టపడే టర్కిష్​ సూప్​ను మీ ఇంట్లోనే ఇలా చేసుకోండి...

కావాల్సినవి

• ఎర్ర పప్పు - కప్పు
• వెజిటబుల్ స్టాక్ - నాలుగు కప్పులు
• ఉల్లిపాయ ముక్కలు - పావు కప్పు
• బంగాళాదుంప ముక్కలు - అర కప్పు
• కారం - టీస్పూన్
• ఉప్పు - టీస్పూన్

తయారీ

ముందుగా ఎర్ర పప్పును కడిగి పెట్టుకోవాలి. ఆ తర్వాత ఒక పెద్ద పాత్రలో పప్పుతో పాటు బంగాళాదుంపలు, ఉల్లిపాయలు, కారం వేసి ఆఖరున వెజిటబుల్ స్టాక్ కూడా పోసేయాలి. ఆ తర్వాత దీన్ని మరిగించుకోవాలి. మరుగుతుండగా మంట తగ్గించుకొని సగం వరకూ మూత పెట్టి ఉడికించుకోవాలి. దీన్ని ఓ అరగంట పాటు ఉడికించుకొని ఆ తర్వాత ఉప్పు వేయాలి. ఇందులోంచి పైపైన ఉన్న నీటిని తీసి పక్కన పెట్టుకొని, అడుగున ఉన్న మిశ్రమాన్ని మిక్సీ పట్టుకోవాలి. ఆ తర్వాత ఈ రెండింటినీ తిరిగి కలుపుకొని మరికాసేపు మరగబెట్టుకుంటే సరి.. టర్కిష్ సూప్ సిద్ధమవుతుంది.

ఇదీ చదవండి:బేక్​ చేయకుండా కేక్​ చేసుకోండిలా...