'చాక్లెట్‌ ఆల్మండ్‌ పుడ్డింగ్‌' ఇంట్లోనే చేసుకుందామిలా...!

ఒకప్పుడు రెస్టారెంట్లు , బేకరీల చుట్టూ తిరుగుతూ.. పుడ్డింగుల మీద పుడ్డింగులు లాగించేవాళ్లం. కానీ, ఈ కరోనా కాలంలో ఆ తిరుగుళ్లూ లేవు, బయటి ఆహారం తినేంత ధైర్యమూ లేదు. అందుకే మరి, ఇంట్లోనే ఎంచక్కా 'చాక్లెట్‌ ఆల్మండ్‌ పుడ్డింగ్‌' చేసుకుని పాత రోజులు గుర్తు చేసుకుందాం రండి..

'చాక్లెట్‌ ఆల్మండ్‌ పుడ్డింగ్‌' రుచికే కాదు.. ఆరోగ్యాన్నీ ఇస్తుంది. బాదంలోని పోషకం, చాక్లెట్ లోని మాధుర్యం కలిపి సింపుల్ గా పుడ్డింగ్ ఎలా చేసుకోవాలో చూసేయండి...

కావల్సినవి

• ఉప్పులేని వెన్న, క్యాస్టర్‌ షుగర్‌ - నూటయాభై గ్రా(150 గ్రాములు) చొప్పున,
• కోడిగుడ్లు - మూడు, బాదంపొడి - వంద గ్రా(100 గ్రాములు),
• మైదా - డెబ్భై గ్రా(70 గ్రాములు),
• చాక్లెట్‌ పొడి - నలభై గ్రా(40 గ్రాములు),
• బేకింగ్‌ పొడి - పదిహేను గ్రా(17 గ్రాములు),
• పాలు - అరవై ఎంఎల్‌(60 గ్రాములు),
• డార్క్‌ చాక్లెట్‌ పలుకులు - డెబ్భై గ్రా(70 గ్రాములు),
• బటర్‌ కాగితం- ఒకటి.

తయారీ

• ఓవెన్‌ను నూట అరవైఅయిదు డిగ్రీల ఉష్ణోగ్రతలో ముందుగా వేడిచేసి పెట్టుకోవాలి. ఒక కేక్‌ టిన్నును తీసుకుని బటర్‌పేపర్‌ను రాయాలి. ఇప్పుడు మైదా, చాక్లెట్‌ పొడిని జల్లించి పెట్టుకోవాలి.
• క్యాస్టర్‌ షుగర్‌, వెన్నను ఓ పాత్రలోకి తీసుకుని చెక్కచెంచాతో బాగా గిలక్కొట్టినట్లు చేయాలి. ఇందులో కోడిగుడ్ల సొనను ఒకేసారి వేసేయాలి. మైదా, చాక్లెట్‌ పలుకులు, బేకింగ్‌పొడి, చాక్లెట్‌పొడి, బాదంపొడి వేస్తూ ఉండలు కట్టకుండా కలపాలి. చివరగా పాలు చేర్చాలి.
• ఈ మిశ్రమాన్ని కేక్‌ టిన్‌లోకి తీసుకొని నీళ్లు పోసిన బేకింగ్‌ ట్రేలో ఉంచి నలభై నుంచి యాభై నిమిషాల దాకా బేక్‌ చేయాల్సి ఉంటుంది. దీన్ని వెనిల్లా ఐస్‌క్రీంతో కలిపి తింటే బాగుంటుంది.

ఇదీ చదవండి: 'పెసర చెగోడీలు' కరకరలాడిద్దామిలా...!