సమోసా.. పిల్లలు పెద్దలు అందరూ ఎంతో ఇష్టంగా తినే ఆహార పదార్థం. ఎక్కువగా ఆలూ, ఉల్లి, నూడుల్స్, కార్న్ ఇలాంటి వాటితో చేసే సమోసాలనూ తరచూ తింటూ ఉంటాం. ఈసారి కాస్త భిన్నంగా కోడిగుడ్డుతో చేసే సమోసాను రుచిచూద్దామాా! ఇంతకీ దీన్ని ఎలా తయారు చేయాలో ఇప్పుడు చూద్దాం.
గుడ్డుతో సమోసా చేయడానికి కావాల్సిన పదార్థాలు
మైదాపిండి: 2 కప్పులు
గోధుమపిండి: కప్పు
నూనె: వేయించడానికి సరిపడా
మంచినీళ్లు: పావు కప్పు
ఉడికించిన గుడ్లు: నాలుగు
మిరియాలపొడి: టీ స్పూను
ఉప్పు: రుచికి సరిపడా
తయారీ విధానం
- ఉడికించిన గుడ్ల పెంకు తీసి చిన్న ముక్కలుగా కోయాలి. వాటిని మళ్లీ చాకుతోనే సన్నగా తురిమినట్లుగా కోయాలి. ఇప్పుడు అందులో మిరియాలపొడి, ఉప్పు వేసి కలిపి పక్కన ఉంచాలి.
- వెడల్పాటి గిన్నెలో మైదాపిండి, గోధుమపిండి, ఉప్పు, కొద్దిగా నూనె వేసి కలపాలి. తర్వాత తగినన్ని నీళ్లు పోసి పిండి ముద్ద చేసి సుమారు అరగంటసేపు తడి బట్టి కప్పి ఉంచాలి.
- పిండిని చిన్న ముద్దల్లా చేసి కాస్త పెద్ద చపాతీలా వత్తాలి. దీన్ని పెనంమీద వేసి రెండువైపులా కాల్చి తీయాలి. ఇదే విధంగా అన్ని చపాతీలు చేయాలి.
- వీటి అంచుల దగ్గర మాడినట్లు అయితే కత్తిరించి సగానికి కోయాలి. ఈ సగం చపాతీ ముక్కలన్నింటినీ తడిబట్టతో కలిపి చాపలా చుట్టి ఓ నిమిషం ఉంచి తీసేయాలి.
- ఇప్పుడు ఒక్కో ముక్కనీ తీసుకొని త్రికోణాకారంలో మడిచి అందులో గుడ్డు మిశ్రమాన్ని పెట్టి సమోసాలా మడవాలి. ఇలాగే అన్నీ చేసి కాగిన నూనెలో వేయించి తీయాలి.
