'ప్రపంచాన్ని జయించినా... భారత్​పై నా లెక్క తప్పిందే?'

కరోనా.. కరోనా.. ఇప్పుడు ఎవరి నోట విన్న ఇదే పేరు. ఇప్పటివరకు ప్రపంచవ్యాప్తంగా ఎన్నో లక్షల మందికి వైరస్ సోకిందని... ఎంతో మందిని బలి తీసుకుందని అందరూ మాట్లాడుకుంటున్నారు. అగ్రరాజ్యమైన అమెరికా మహమ్మారి ధాటికి అతలాకుతలమవుతోందని, ఐరోపా దేశాల్లో అయితే ఈ వైరస్​ విలయతాండవం చేస్తోందని చెవులు కొరుక్కుంటున్నారు. కానీ ప్రపంచ దేశాలను కుదిపేస్తున్నప్పటికీ భారత్​లో మాత్రం దీని ప్రభావం ఒకింత తక్కువగానే ఉందని చెప్పక తప్పదు. మరి ప్రపంచ దేశాలను పక్కన పెడితే కరోనా వైరస్​ మన భారతదేశం గురించి ఎలా అనుకుంటుందో తెలుసుకుందాం!

కరోనా అనే నేను...

‘కరోనా అనే నేను... మీ ఆరోగ్య, ఆర్థిక విచ్ఛిత్తికి ఎల్లవేళలా కృషి చేస్తానని... మొండితనాన్ని పుణికి పుచ్చుకొని నా ఉనికిని చాటుతానని నా విధి నిర్వహణలో రాగ ద్వేషాలకు తావివ్వనని... అస్మదీయులు-తస్మదీయులనే తారతమ్యం చూపనని... నాకు అందరూ 'భస్మ'దీయులే అని, నా కర్తవ్యాలను శ్రద్ధతో, అంతఃకరోనాశుద్ధితో నిర్వహిస్తానని ప్రమాణం చేస్తున్నా...

ప్చ్‌! ఎంత ఘనంగా ప్రమాణస్వీకారం చేసి ఏం లాభం...

నా పని నన్ను మీరు సరిగా చేసుకోనివ్వడం లేదుగా! చైనాలో చీల్చిచెండాడా... ఇటలీలో అల్లకల్లోలం సృష్టించా... స్పెయిన్‌కు పెయిన్‌ అంటే ఏమిటో రుచి చూపించా! పెద్దన్న అమెరికా ఇగోను టచ్‌ చేసి ఇరకాటంలో పెట్టా! మీ భారతదేశంలో మాత్రం ఒకింత నత్తనడక నడుస్తున్నా! కొంచెం వేగం పెరిగినా ఇది ప్రపంచంతో పోల్చుకుంటే- అబ్బే... బొత్తిగా తుస్సే!

కారణం ఏమిటా అని ఆరాతీస్తే- అసలు విషయం తెలిసింది. నాకు ప్రధానంగా ఇద్దరు శత్రువులు తయారయ్యారని! ఒకరు లాఠీ పట్టుకుని... ఖాకీ చొక్కా వేసుకున్న పోలీసు! మరొకరు మెడలో స్టెతస్కోపుతో... చేతిలో సూదిమందుతో వైద్యుడు! ఈ ఇద్దరూ నా పని నన్ను చేసుకోనివ్వడం లేదు.

మీరే చెప్పండి- నాకూ ‘కరోనా కుటుంబం’ ఉంది. నా టార్గెట్లు నాకుంటాయి! నేను బద్దలు కొట్టాల్సిన రికార్డులూ నాకుంటాయి! ఇవి చేరుకోకుంటే నా ‘కరోనా కుటుంబం’ ముందు నా ఇతర వైరస్‌ బంధువుల ముందు నా పరువు బరువు ఏం కావాలి?!

మా పెదనాన్న మశూచి పిశాచిని టీకాతో ఠికాణా లేకుండా చేశారు. మా పిన్ని పోలియోను పో... పొమ్మని వెళ్లగొట్టారు. మా చిన్నాన్న ఎయిడ్స్‌కూ ఇప్పుడు ఎవరూ పెద్దగా భయపడటం లేదు. హాయిగా ఆయుర్దాయం పెంచేసుకుంటున్నారు. మా వేలువిడిచిన వియ్యంకుడు జికా నుంచి జింకల్లా తప్పించుకున్నారు. మా మేనమామ ఎబోలా సైతం తొందరగానే చాప చుట్టేశాడు. మా మరదలు పిల్ల నిఫా పాచికల్నీ పారకుండా చేశారు. మా బావమరిది సార్స్‌ మీ ముందు పగిలిన సాసరే అయ్యాడు. అంతెందుకు- స్పానిష్‌ ఫ్లూ నుంచి స్వైన్‌ ఫ్లూ వరకు మీ మానవులు అన్నింటినీ తట్టుకున్నారు. ఎన్నింటినో జయించారు. రేపోమాపో నా తోకా కత్తిరిస్తారు. నా కోరలూ పీకేస్తారు. ఈ లోపు నా ఆకలి నేను తీర్చుకోవాలి కదా!