హోలీ పండుగ ఇష్టపడని వారుండరు. చిన్నాపెద్దా అంతా కలిసి రంగులతో కేరింతలు కొడుతుంటారు. ఐతే.. రంగులతో ఆడుతున్నప్పుడు కొన్ని జాగ్రత్తలు తప్పకుండా తీసుకోవాల్సి ఉంటుంది. అవేంటంటే..
- జుట్టుకు బాగా నూనె రాసి హోలీ ఆడండి. ఆ తర్వాత తలస్నానం చేసేస్తే రంగులు త్వరగా వదిలిపోతాయి. నూనె రాయకపోతే మాడుకు అంటుకున్న రంగుల వల్ల జుట్టు పొడిబారుతుంది.
- ముఖం, మెడ, చేతులకు సన్‌స్క్రీన్‌ క్రీమ్‌ రాసుకోవడం మర్చిపోవద్దు. లేకపోతే ఎండలో ఎక్కువసేపు ఆడటం వల్ల చర్మం కందిపోతుంది.
- బయటకు వెళ్లే ముందు కనుబొమలు, పెదవులు, గోళ్లకు పెట్రోలియం జెల్లీ రాయండి. ఇలాచేస్తే రంగులను కడుక్కోవడం తేలికవుతుంది.
- ఐస్‌క్యూబ్‌తో ముఖం మీద సున్నితంగా రాయడం వల్ల చర్మ రంధ్రాలు మూసుకుంటాయి. దీంతో రంగులు లోపలికి చొచ్చుకువెళ్లే అవకాశం ఉండదు.
- గోళ్లు పెద్దగా ఉంటే వాటిని కత్తిరించుకుని నెయిల్‌ పాలిష్‌ వేయడం మర్చిపోకండి.
- చేతులు, కాళ్లకు చక్కగా మాయిశ్చరైజర్‌ రాయండి. దీంతో చర్మం తేమగా ఉండటంతోపాటు రంగులను వదిలించుకోవడానికి ఎక్కువ శ్రమపడాల్సిన పనీ ఉండదు.
- హోలీ రోజున సింథటిక్‌వి కాకుండా కాటన్‌ దుస్తులు వేసుకుంటే అవి రంగులను తేలిగ్గా పీల్చుకుంటాయి. దురదలూ రావు.
