టిక్టాక్ వీడియోలతో.. కొంతమంది ఫేమస్ అవుతుంటే.. మరి కొంతమంది బలైపోతున్నారు. తాజాగా తన స్నేహితుడే.. వీడియో చేసి పరువు తీశాడని మనస్తాపం చెందిన ఓ వ్యక్తి ఆత్మహత్య చేసుకున్నాడు. ఆంధ్రప్రదేశ్ తూర్పుగోదావరి జిల్లా రాజోలు మండలం శివకోటికి చెందిన పుచ్చకాయల మోహన కుమార్(30) ఉపాధి నిమిత్తం కువైట్ వెళ్లాడు.
అక్కడ పని చేసుకుంటూ ఇంటికి డబ్బులు పంపించేవాడు. 2 వేల రూపాయలు చీటి పాడుకుని కనిపించకుండా పరారీలో ఉన్నాడని కుమార్పై తన స్నేహితుడు.. ఓ టిక్ టాక్ వీడియో చేశాడు. తనపై ఆరోపణలు చేస్తూ.. వీడియో చేయడం వల్ల తన పరువు పోయిందని మోహన కుమార్ మనస్తాపం చెందాడు. కువైట్లోనే ఈ నెల మూడో తేదీన ఉరేసుకుని బలవన్మరణానికి పాల్పడ్డాడు. కువైట్ ఎంబసీ అధికారులతో భారత ఎంబసీ అధికారులు మాట్లాడి మృతదేహాన్ని తీసుకువచ్చారు. ఉపాధి కోసం వెళ్లిన తన కుమారుడు విగతజీవిగా తిరిగి రావడంతో కుటుంబ సభ్యులు కన్నీరు మున్నీరుగా విలపించారు.
ఇదీ చదవండి: అయ్యో.. టిక్టాక్ ఎంత పని చేశావ్!
