ఏపీ ముఖ్యమంత్రి జగన్మోహన్ రెడ్డి, ఎమ్మెల్యే అంబటి రాంబాబుకు లేఖ రాసి దివ్యాంగురాలైన వాలంటీర్ ఆత్మహత్యాయత్నం చేసుకున్న ఘటన గుంటూరు జిల్లా సత్తెనపల్లిలో మంగళవారం జరిగింది. ఐదో వార్డు సచివాలయం వాలంటీరు మహంకాళి అంకేశ్వరి ఎలుకల మందు తిని ఆత్మహత్యకు యత్నించించింది. కుటుంబ సభ్యులు ఆమెను ప్రభుత్వాసుపత్రికి తీసుకెళ్లారు. పరిస్థితి విషమంగా ఉండటంతో గుంటూరు జీజీహెచ్కు తరలించారు.
నా ఆత్మహత్యకు అతనే కారణం
'తాను ఆరో వార్డు రేషన్ డీలరు వేధింపులు తాళలేక చనిపోతున్నట్లు.. నిజాయతీగా పనిచేస్తున్నప్పటికీ అనర్హురాలికి చేయూత పథకం లబ్ధి అందలేదనే కారణాన్ని చూపించి ఉద్యోగం నుంచి తొలగించే ప్రయత్నం చేస్తున్నారు'. అని వాలంటీరు వద్ద లభ్యమైన లేఖలో ఆమె పేర్కొంది. తన ఆత్మహత్యకు రేషన్ డీలర్ కారణమని ఆరోపిస్తూ వాలంటీర్లూ క్షమించండి... అమ్మా క్షమించు అని ఆమె లేఖలో రాసింది.
ఉద్యోగం నుంచి తొలగించాలని కమిషనర్కు లేఖ
అర్హత ఉన్నప్పటికీ ప్రభుత్వ పథకాల లబ్ధి అందజేయట్లేదని... సకాలంలో తమకు పథకాలు అందేలా చూడట్లేదని ఆరో వార్డుకు చెందిన ప్రజలు వాలంటీర్ అంకేశ్వరిపై స్పందనలో లిఖితపూర్వక ఫిర్యాదు చేశారు. అధికారులు విచారణ చేపట్టి ఆమెను ఉద్యోగం నుంచి తొలగించాలని సిఫార్సు చేస్తూ కమిషనర్కు లేఖ పంపారు. తనను విధుల నుంచి తొలగిస్తారని భావించి మనస్తాపంతో ఆత్మహత్యాయత్నం చేసుకున్నట్లు భావిస్తున్నామని ఎస్సై చెప్పారు.
