పోలీసుల అదుపులో టీవీ 9 మాజీ సీఈవో రవిప్రకాశ్

టీవీ9 మాజీ సీఈవో రవిప్రకాశ్​ను బంజారాహిల్స్ పోలీసులు అరెస్టు చేశారు. అసోసియేటెడ్ బ్రాడ్ కాస్ట్ లిమిటెడ్ నుంచి నిబంధనలకు విరుద్ధంగా డబ్బులు తీసుకున్నట్లు అలంద మీడియా ఫిర్యాదు చేసింది. రెండు మూడు సంవత్సరాల్లో సుమారు రూ.100 కోట్ల నగదును తీసుకున్నట్లు ఫిర్యాదులో పేర్కొన్నారు. ఈ మేరకు పూర్తి ఆధారాలు సమర్పించారు. కేసు నమోదు చేసుకొని దర్యాప్తు చేపట్టిన పోలీసులు రవిప్రకాశ్​పై పలు సెక్షన్ల కింద కేసులు నమోదు చేశారు. రవిప్రకాశ్​, కేబీఎన్ మూర్తి కలిసి పలు దఫాలుగా ఏబీసీఎల్ నుంచి నగదు తీసుకున్నట్లు గుర్తించారు. దీనికి సంబంధించిన పూర్తి వివరాలు రవిప్రకాశ్​ నుంచి సేకరించిన పోలీసులు... ఆయనపై కేసు నమోదు చేశారు. మరికాసేపట్లో రవిప్రకాశ్​ను న్యాయస్థానంలో హాజరుపరిచే అవకాశం ఉంది.