పెద్దపల్లి జిల్లా గోదావరిఖనిలోని స్థానిక హనుమాన్నగర్కు చెందిన 18 ఏళ్ల యువకుడు ఈ నెల ఒకటో తేదీన రాత్రి గోదావరిలో గల్లంతయ్యాడు. సమాచారం అందుకున్న పట్టణ రెండో ఠాణా సీఐ శ్రీనివాస్ మంథని మండలం బెస్తపల్లి గ్రామ పంచాయతీ పరిధిలోని గంగపుత్ర గజ ఈతగాళ్ల సొసైటీకి సమాచారమిచ్చారు. ఘటనా స్థలికి చేరుకున్న గజ ఈతగాళ్ల బృందం గాలింపు చర్యలు చేపట్టింది. నిండు గోదావరిలో ముమ్ముర గాలింపుల అనంతరం మధ్యాహ్నం రెండు గంటల సమయంలో మంచిర్యాల జిల్లా జైపూర్ మండల శివారులోని సుందిళ్ల బ్యారేజీ వద్ద మృతదేహం లభ్యమైంది.
గాలింపు చర్యల్లో కునారపు వెంకటేశ్ గంగపుత్ర, కునారపు లక్ష్మణ్ గంగపుత్ర, ఉమ్మడి గ్రామ పంచాయతీ మాజీ ఉప సర్పంచ్ బోరే లింగయ్య గంగపుత్ర, గుమ్ముల రాజేశం గంగపుత్ర, పల్లికొండ క్రాంతి గంగపుత్ర పాల్గొన్నారు.
