చర్లపల్లి జైలులో రిమాండ్​ ఖైదీ మృతి

చైన్​ స్నాచింగ్​ కేసుల్లో రిమాండ్​ ఖైదీ చర్లపల్లి కేంద్ర కారాగారంలో ​ గుండె పోటుతో మృతి చెందినట్లు జైలు అధికారులు తెలిపారు. కానీ పోలీసులు కొట్టిన దెబ్బలకే తన భర్త మరణించినట్లు రవినాయక్​ భార్య పేర్కొంది. పోస్టుమార్టం నిమిత్తం మృత దేహాన్ని గాంధీ ఆస్పత్రికి తరలించారు.

చర్లపల్లి సెంట్రల్ జైల్లో రిమాండ్ ఖైదీగా ఉన్న రవి నాయక్ (37) గుండెపోటుతో మృతి చెందినట్లు జైలు అధికారులు తెలిపారు. మహబూబ్ నగర్ జిల్లా​ అనువాడ మండలం బుద్దారం గ్రామానికి చెందిన రవినాయక్​పై చైన్ స్నాచింగ్ కేసుల్లో రెండున్నర నెలల క్రితం పీడీ యాక్ట్ కింద కేసు నమోదైంది. అతనిపై శంషాబాద్ పోలీస్ స్టేషన్​లో కేసు నమోదు కావటంతో జైలు​లో రిమాండ్​లో ఉన్నాడు.

రవినాయక్​ మృతిపై పోలీసులకు ఫిర్యాదు

కాగా జైలు అధికారులు, పోలీసులు కొట్టిన దెబ్బలకే తన భర్త మరణించాడని మృతుడి భార్య, కుటుంబ సభ్యులు కుషాయిగూడలో పోలీస్​ స్టేషన్​లో ఫిర్యాదు చేశారు. చర్లపల్లి జైలు సూపరింటిండెంట్​, శంషాబాద్ సీఐ వెంకట్​ రెడ్డిలే ఈ ఘటనకు కారణమని పేర్కొన్నారు. పోస్టుమార్టం నిమిత్తం రవినాయక్ మృతదేహాన్ని గాంధీ హాస్పిటల్​కు జైలు అధికారులు తరలించారు.

ఇదీ చదవండి: తెర వెనుక చైనా.. కూపీ లాగుతున్నాం: అవినాష్ మహంతి