షీటీం పోలీసులమని చెప్పి మోసం చేసిన వ్యక్తుల అరెస్ట్​

షీటీం పోలీసులమని చెప్పి ప్రేమ వంచనకు గురైన ఓ బాధితురాలి నుంచి రూ. రెండు లక్షలు కాజేసిన ఘటన సూర్యాపేట జిల్లా కేంద్రంలో జరిగింది. బాధితురాలి ఫిర్యాదుతో స్పందించిన స్థానిక పోలీసులు నిందితులను అరెస్ట్​ చేశారు. అక్రమ వసూళ్ల వ్యవహారంలో జగిత్యాల జిల్లాకు చెందిన యువతి పాలుపంచుకుంది.

వనపర్తి జిల్లాకు చెందిన ఓ యువతి హైదరాబాద్​లోని మహిళా హాస్టల్​లో ఉంటూ ఎస్​బీఐ బ్యాంకులో క్రెడిట్​ కార్డులు జారీ చేసే ఓ ప్రైవేట్ సంస్థలో ఉద్యోగం చేస్తోంది. ఈ క్రమంలో సూర్యాపేట జిల్లా రాయినిగూడెంకు చెందిన ఓ యువకునితో పరిచయం ఏర్పడింది. అది ప్రేమగా మారి వివాహం చేసుకుందామన్నారు. రోజులు గడవగా.. యువకుడు పెళ్లికి నిరాకరించగా అతనిపై బాధితురాలు సూర్యాపేట షీటీం పోలీసులకు ఫిర్యాదు చేసింది. ఈ కేసులో యువతి స్నేహితులైన విజయ్, ప్రవీణ్, కావ్య మధ్యవర్తులుగా వ్యవహరించారు. పెళ్లి పేరుతో వంచించినందుకు యువతికి రూ. 4 లక్షలు చెల్లించాలని ఒప్పందం ఖరారు చేసుకున్నారు.

ఈ ఒప్పందాన్ని ఆసరా చేసుకున్న యువకులు.. షీటీం పోలీసులు అడిగారని బెదిరించారు. షీటీం పోలీస్​గా ఓ యువకునితో ఫోన్​లో మాట్లాడించారు. భయపడిన బాధిత యువతి.. రూ. 2 లక్షలు ముట్టజెప్పింది. ఆ తర్వాత తనను బెదిరించి వారు షీటీం పోలీసులు కాదని తెలుసుకుని బాధితురాలు.. పోలీసులకు ఫిర్యాదు చేసింది. ఈ మేరకు కేసు నమోదు చేసుకున్న పోలీసులు.. విచారించి.. యువకులను అరెస్ట్ చేసినట్లు సూర్యాపేట డీఎస్పీ మోహన్​కుమార్​ తెలిపారు.

ఇదీ చూడండి: వ్యవసాయ బిల్లులపై రైతులకు కేంద్రం భరోసా