'నమస్తే మేడం మీరు లాటరీలో కారు గెలుచుకున్నారు. అది మీకు పంపించాలంటే రూ. 11 లక్షలు మా అకౌంట్లో వేస్తే వారంలో మీ ఇంటికి ఖరీదైన కారు వస్తుంది'. ఇలా సైబర్ నేరగాళ్లు మాయమాటలు చెప్పి ఓ మహిళా వద్ద నుంచి రూ.11 లక్షల నగదును కాజేసిన ఘటన ఏపీలోని గుంటూరు జిల్లాలో జరిగింది. ఈ ఘటనకు కారణమైన ఇద్దరు నిందితులను అదుపులోకి తీసుకుని విచారిస్తున్నామని గుంటూరు సౌత్ డీఎస్పీ కమలాకర్ రావు తెలిపారు. సైబర్ క్రైమ్లో మరో ఇద్దరి పాత్ర ఉందని... వారిని కూడా త్వరలోనే అదుపులోకి తీసుకుంటామని డీఎస్పీ చెప్పారు.
గుంటూరు జిల్లా వట్టిచెరుకూరు మండలం గారపాడు గ్రామానికి చేందిన వణుకురి విజయలక్ష్మి అనే మహిళకు... గత నెల 7న తాము నాప్టాల్ నుంచి ఫోన్ చేస్తున్నాం.. మీకు కారు గిఫ్ట్గా వచ్చింది. అయితే కొవిడ్ కారణంగా కారు పంపించలేము.. దానికి బదులుగా రూ. 35 లక్షల నగదును మీకు పంపిస్తాం... దాని కోసం మీరు 4% డబ్బులు చెల్లించాల్సి ఉంటుందని పశ్చిమ బెంగాల్కి చెందిన సైబర్ నేరగాళ్లు ఫోన్ చేశారు. ఇలా పలుమార్లు ఫోన్ చేసి బాధితురాలు ఇంటికి కంపెనీకి సంబంధించిన లేఖ పంపించారు. నిజమే అని నమ్మిన బాధితురాలు వారు చెప్పిన అకౌంట్ నంబర్లకు రూ.11,30,300 నగదును జమ చేసింది.
నగదు ఖాతాలో వేసి 10 రోజులు గడిచినా వారికి రూ.35 లక్షలు రాలేదు. మోసపోయానని గమనించిన బాధితురాలు వట్టిచెరుకూరు పోలీస్స్టేషన్లో ఫిర్యాదు చేశారు. అయితే కేసు నమోదు చేసిన పోలీసులు అకౌంట్ నెంబర్ సాయంతో ఇద్దరు నిందితులను పశ్చిమబెంగాల్లోని షమిల్పూర్లో అరెస్టు చేసినట్లు చెప్పారు. కేసులో కీలకమైన మరో ఇద్దరు నిందితులు పరారీలో ఉన్నారని... వారిని కూడా త్వరలోనే అరెస్ట్ చేసి నగదును రికవరీ చేస్తామన్నారు డీఎస్పీ కమలాకర్.
ఇదీ చదవండి: నమ్మకంగా పనిచేస్తారు.. మత్తుమందిచ్చి ఇలంతా దోచేస్తారు..
