మెదక్ జిల్లా మాసాయిపేటలో గత నెల 16న జరిగిన సెల్ఫోన్ల భారీ చోరీని పోలీసులు ఛేదించారు. నిందితులను అదుపులోకి తీసుకుని.. సెల్ఫోన్లు స్వాధీనం చేసుకున్నారు.
అసలేమైందంటే..
గత నెల 15న చెన్నై నుంచి దిల్లీకి రూ.11 కోట్ల విలువైన చరవాణులను తీసుకొని ఓ కంటైనర్ లారీ బయలుదేరింది. 16వ తేదీన మార్గమధ్యలో సెల్ఫోన్లు అపహరణకు గురయ్యాయి. ఆదిలాబాద్‌ జిల్లా ఇచ్చోడకు చేరుకున్న తర్వాత విషయాన్ని గుర్తించిన డ్రైవర్.. రూ.2.85 కోట్ల విలువ చేసే 2200 ఫోన్లు అపహరణకు గురైనట్లు కంపెనీ ప్రతినిధులకు సమాచారమిచ్చాడు. మెదక్ జిల్లా మాసాయిపేట వద్ద గల ఓ దాబా వద్ద భోజనం కోసం కంటైనర్ను 45 నిమిషాలు నిలిపారు. ఈ నేపథ్యంలో అక్కడే చోరీ జరిగిందనే అనుమానంతో చేగుంట పోలీస్ స్టేషన్లో ఫిర్యాదు చేశారు.
సీసీటీటీ ఫుటేజీల సాయంతో..
ఈ మేరకు కేసు నమోదు చేసుకున్న పోలీసులు రెండు ప్రత్యేక బృందాలను ఏర్పాటు చేశారు. రంగంలోకి దిగిన ప్రత్యేక బృందాలు.. చరవాణులతో కంటైనర్ బయలుదేరిన చెన్నై నుంచి మొదలుకొని దొంగతనం జరిగిందని భావించిన మాసాయిపేట వరకు అన్ని సీసీటీవీ ఫుటేజీలను విశ్లేషించారు. చిత్తురు జిల్లా శ్రీసిటీ నుంచి ఓ లారీ, కారు కంటైనర్ను వెంబడించినట్టు గుర్తించారు. వీటి ద్వారానే చోరీకి పాల్పడ్డారన్న అనుమానంతో.. ఆ వాహనాలు ఎవరి పేరు మీద రిజిస్టర్ అయ్యాయో వివరాలు సేకరించారు. ఈ కారు, లారీ మాసాయిపేట నుంచి మధ్యప్రదేశ్‌లోని దేవాస్‌ వైపు వెళ్లినట్లు ఆ మార్గంలోని టోల్గేట్ల వద్ద ఉన్న సీసీటీవీ ఫుటేజీ సాయంతో గుర్తించారు. దీంతో ఈ ప్రాంతానికి చెందిన కంజర్‌భట్‌ అనే నరహంతక ముఠానే ఈ చోరీకి పాల్పడినట్లు పోలీసులు నిర్ధారించుకున్నారు.
ఆ విషయంలో సిద్ధహస్తులు..
కంజర్‌భట్‌ ముఠా కదులుతోన్న వాహనాల్లో నుంచి చోరీ చేయడంలో సిద్ధహస్తులు. మాసాయిపేట వద్ద తాళం తీసిన ముఠా.. కంటైనర్ కదులుతుండగానే కారు, లారీలో ప్రయాణిస్తూ సెల్ఫోన్లను కొట్టేసినట్లు పోలీసులు గుర్తించారు. ఈ క్రమంలోనే ప్రత్యేక దర్యాప్తు బృందాలు ముఠా ఉండే ధానఘేట్ గ్రామానికి చేరుకున్నారు. గ్రామంలోని ఓ ఇంట్లో భద్రపరిచిన రూ.2.35 కోట్ల విలువ చేసే 1,826 సెల్ఫోన్లను స్వాధీనం చేసుకున్నారు. నిందితులను అదుపులోకి తీసుకున్నారు. పరారీలో ఉన్న మరికొంతమంది కోసం గాలిస్తున్నారు.
ఇదీ చూడండి: ఏపీ: సెల్ఫోన్ కంటైనర్ చోరీ కేసును ఛేదించిన పోలీసులు
