భద్రాద్రి కొత్తగూడెం జిల్లా భద్రాచలంలోని అంబేద్కర్ సెంటర్లో భద్రాచలం పోలీసులు భారీ స్థాయిలో హైదరాబాద్కు తరలిస్తున్న గంజాయిని పట్టుకున్నారు. రోజూవారి తనిఖీల్లో భాగంగా ఎస్సై మహేష్ ఆధ్వర్యంలో అంబేద్కర్ సెంటర్లో నిర్వహిస్తున్న తనిఖీల్లో భాగంగా 80 కేజీల గంజాయిని తరలిస్తున్న కారును గుర్తించారు. తూర్పు గోదావరి జిల్లా చింతూరు నుంచి హైదరాబాద్కు గంజాయి తరలిస్తున్నట్టు సీఐ వినోద్ రెడ్డి తెలిపారు. హైదరాబాద్కు చెందిన సతీష్, మహారాష్ట్రకు చెందిన దీపక్ అనే గంజాయి స్మగ్లర్లను అరెస్టు చేశారు. భద్రాచలంలో ప్రధాన రహదారులలో ప్రత్యేక సోదాలు చేస్తున్నామని సీఐ తెలిపారు. అక్రమ మార్గంలో డబ్బు సంపాదించాలని ప్రయత్నించే వారు ఏదో ఒకనాడు కటకటాల్లోకి వెళ్లాల్సిందే అని సీఐ హెచ్చరించారు.
ఇదీ చూడండి : ఒకప్పుడు ఆటలో మేటి.. విధి వక్రించి బతుకు భారమైంది!
