ఏపీలోని శ్రీకాకుళం జిల్లా సోంపేట మండలం సిరిమామిడిలో నాటుసారా తాగి 25 మంది అస్వస్థతకు గురయ్యారు. బాధితులను హరిపురం సామాజిక ఆసుపత్రికి తరలించి చికిత్స అందిస్తున్నారు. కాగా వీరిలో ఇద్దరి పరిస్థితి విషమంగా ఉండటంతో మెరుగైన చికిత్స నిమిత్తం శ్రీకాకుళం జీజీహెచ్కు తరలించారు. వీరి పరిస్థితి కాస్త మెరుగుపడిందని వైద్యులు తెలిపారు. అస్వస్థతకు గురైన మిగిలిన 23 మంది బాధితులకు చికిత్స అందించి ఇళ్లకు పంపించారు.
పోలీసుల ఆరా..
ఈ ఘటనపై పోలీసులు ఆరా తీస్తున్నారు. గ్రామంలో ఓ వ్యక్తి చనిపోవటంతో ఆ కార్యక్రమానికి హాజరైన 25 మంది నాటు సారా సేవించారు. కొద్దిసేపటికే వీరు రక్తపు వాంతులు చేసుకున్నారు. అయితే నాటు సారా ఎక్కడినుంచి తెప్పించారనే విషయంపై పోలీసులు విచారణ చేపట్టారు. ఒడిశా నుంచి వస్తున్న నాటుసారాను ఇచ్ఛాపురం, సోంపేట, కంచిలి, మందస మండలాల్లో జోరుగా విక్రయిస్తున్నారు. అక్కడినుంచే నాటుసారా తెప్పించినట్లు పోలీసులు భావిస్తున్నారు. ఇలాంటి ఘటనలు పునరావృతం కాకుండా చర్యలు తీసుకుంటామని పోలీసులు చెబుతున్నారు.
ఇదీ చదవండి: గిఫ్ట్ల ఎర చూపి... ఆస్తులమ్ముకునేలా చేస్తారు...!
