తాలిబన్లు అఫ్గాన్(Afghanistan Taliban) రాజధాని కాబుల్లోని నార్వే రాయబార కార్యాలయాన్ని (afghan taliban) స్వాధీనం చేసుకున్నారు. అందులోని మద్యం సీసాలను పగులగొట్టి, పిల్లల పుస్తకాలను ధ్వంసం చేశారు. ఈ విషయాన్ని నార్వే రాయబారి సిగ్వాల్డ్ హౌజ్ ట్విట్టర్‌ వేదికగా వెల్లడించారు. "కాబుల్లోని మా కార్యాలయాన్ని తాలిబన్లు స్వాధీనం చేసుకున్నారు. ముందుగా మద్యం సీసాలను పగులగొట్టారు. పిల్లల పుస్తకాలను నాశనం చేశారు" అని ఆయన ట్విటర్‌లో పేర్కొన్నారు.
గతంలో తాలిబన్లు రాయబార కార్యాలయాలతో సహా విదేశీ దేశాల దౌత్య సంస్థల్లో జోక్యం చేసుకోబోమన్నారు. కానీ, దానికి భిన్నంగా వ్యవహరిస్తూ వారి వక్రబుద్ధిని మరోసారి నిరూపించుకున్నారు.
కాబుల్‌లో ఉన్న తమ రాయబార కార్యాలయాలను (afghanistan news) మూసివేస్తామని డెన్మార్క్‌, నార్వే దేశాలు గత నెలలోనే ప్రకటించాయి. తాజాగా 'కాబుల్లోని రాయబార కార్యాలయాన్ని తాత్కాలికంగా మూసివేయాలని నిర్ణయించాం' అని డానిష్‌ విదేశాంగ మంత్రి జెప్పే కొఫోడ్ తెలిపారు. అనంతరం నార్వే విదేశాంగ మంత్రి ఇనే సోరైడ్ కూడా రాయబార కార్యాలయాన్ని మూసివేసి నార్వే దౌత్యవేత్తలు, సిబ్బందిని ఖాళీ చేయనున్నట్లు వెల్లడించారు. కాగా అమెరికా సైన్యం అఫ్గాన్ నుంచి నిష్క్రమించిన తర్వాత అక్కడే చిక్కుకొన్న 200 మంది అమెరికన్లు, ఇతర విదేశీయులను చార్టర్ విమానాల్లో తీసుకెళ్లడానికి తాలిబన్లు అంగీకరించారు.
'బ్లాక్లిస్ట్ నుంచి తొలగించండి'
అఫ్గాన్‌లో తాలిబన్లు, హక్కానీ నేతలతో ఏర్పాటు చేసిన కేబినెట్లో.. హక్కానీ నెట్‌వర్క్‌కు చెందిన సిరాజుద్దీన్‌ హక్కానీ తదితరులు చోటుదక్కించుకున్నారు. వీరంతా అమెరికా నిషేధిత జాబితాలో నమోదై ఉన్నవారు కావడం గమనార్హం. ఈ క్రమంలో వారిని సదరు జాబితా నుంచి తొలగించాలని (taliban news) తాలిబన్లు డిమాండ్ చేస్తున్నారు. బ్లాక్ లిస్ట్ విషయంలో అమెరికా ప్రస్తుత వైఖరి.. దోహా ఒప్పందాన్ని ఉల్లంఘించడమేనని, ఈ తీరు ఆమోదయోగ్యం కాదని వారు పేర్కొన్నారు.
'హక్కానీ నెట్‌వర్క్‌ ప్రస్తుతం ఇస్లామిక్ ఎమిరేట్‌లో ఒక భాగం. దీనికి ప్రత్యేక పేరు, సంస్థ అంటూ లేదు. నిషేధిత జాబితాను సవరించకపోవడం అంటే.. అమెరికా మా అంతర్గత వ్యవహారాల్లో జోక్యం చేసుకుంటోందన్నట్లే. మేం దీన్ని అంగీకరించం. దౌత్యచర్చలతో వీలైనంత త్వరగా ఈ సమస్యను పరిష్కరించాలి' అని అన్నారు. కొత్త కేబినేట్‌లోని ప్రధాని ముల్లా మహ్మద్‌ హసన్‌ అఖుంద్‌ సహా దాదాపు 14 మంది సైతం ఐరాస ప్రకటించిన నిషేధిత జాబితాలోని వ్యక్తులే కావడం గమనార్హం. ప్రపంచవ్యాప్తంగా తీవ్రమైన నేర, ఉగ్రవాద కార్యకలాపాలకు పాల్పడినవారిని ఈ జాబితాలోకి చేర్చుతారు.
ఇదీ చూడండి : Taliban news: అఫ్గాన్ సంక్షోభానికి తాలిబన్ల 'ఆజ్యం'
