కరోనా మహమ్మారి కారణంగా ఇస్లాం పవిత్ర క్షేత్రం మక్కాలో.. గత ఏడు నెలలుగా ఉన్న ఆంక్షలను క్రమంగా ఎత్తివేస్తోంది సౌదీ అరేబియా. ఈ క్రమంలో అక్టోబర్ 4 నుంచి మక్కాలోని ఉమ్రాయాత్రకు సందర్శకులను అనుమతించనున్నట్లు వెల్లడించింది. రోజుకు 6 వేల మందికి ఈ అవకాశం ఇవ్వాలని ప్రభుత్వం యోచిస్తున్నట్లు ఆ దేశ మీడియా నివేదించింది. తొలి దశలో సౌదీ పౌరులు, స్థానికులను మాత్రమే అనుమతించనున్నారు.
మసీదులోకి ప్రవేశించి ఉమ్రాయాత్రను చేపట్టే ముందే.. ఆన్లైన్ పోర్టల్ ద్వారా దరఖాస్తు చేసుకోవాలి. కావాల్సిన తేదీ, సమయాన్ని రిజర్వ్ చేసుకోవాలి. ఆన్లైన్ దరఖాస్తులు సెప్టెంబర్ 27 నుంచి ప్రారంభం కానున్నాయి. మసీదులో రద్దీని నిరోధించటం, భౌతిక దూరాన్ని పాటించాలనే ఉద్ధేశంతోనే ఈ మేరకు నిర్ణయం తీసుకున్నట్లు తెలుస్తోంది. మొబైల్ యాప్ ద్వారా కూడా తమ యాత్ర మార్గాలను, సమావేశాలను ఎంపిక చేసుకునే వీలు కల్పించారు.
అక్టోబర్ 18 నుంచి రెండో దశ..
అక్టోబర్ 18 నుంచి రెండో దశ ప్రారంభం కానుంది. ఇందులో గరిష్ఠంగా రోజుకు 15000 మంది యాత్రికులను యాప్ ద్వారా కేటాయించిన సమయాల్లో ప్రార్థనలకు అనుమతించనున్నారు. ఈ మసీదులో క్యూబ్ ఆకారంలో ఉన్న కాబాను ముస్లింలు రోజుకు ఐదుసార్లు ప్రార్ధిస్తారు.
విదేశీయులకు నవంబర్ 1 నుంచి..
ఉమ్రాయాత్ర చేపట్టాలనుకునే విదేశీ ముస్లింలకు నవంబర్ 1 నుంచి అనుమతులు ఇస్తామని సౌదీ అరేబియా హోంశాఖ ప్రకటించింది. ఈ ఏడాది మార్చ్ తర్వాత ఇటీవలే అంతర్జాతీయ విమానాలపై ఆంక్షలు ఎత్తివేసింది సౌదీ. ఈ క్రమంలో విదేశీ ముస్లింలు ఉమ్రాయాత్రకు వెళ్లే అవకాశం లభించనుంది.
కరోనా మహమ్మారి వ్యాప్తికి ఈ యాత్ర గ్లోబల్ సూపర్-స్ప్రైడర్గా మారుతుందన్న ఆందోళనతో.. గత జులైలో చాలా తక్కువ మందితో హాజ్ను నిర్వహించింది సౌదీ. ఆన్లైన్ ద్వారా దరఖాస్తు చేసుకున్న స్థానికులను మాత్రమే ఎంపిక చేసి ప్రార్థనలకు అనుమతించింది. ప్రతి ఏటా సుమారు 20 లక్షల మంది ఈ యాత్రకు వస్తారు. కానీ గత జులైలో కేవలం రోజుకు 1000 మందిని మాత్రమే ప్రార్థనలకు అవకాశం కల్పించారు. జులైలో నిర్వహించిన హాజ్ విజయవంతమైన నేపథ్యంలో ఆంక్షలను సడలిస్తున్నట్లు తెలుస్తోంది.
ఇదీ చూడండి:ఉమ్రా యాత్రలకు పయనమైన ముస్లిం సోదరులు
