కరోనా వైరస్ను సమర్థవంతంగా అడ్డుకోవడానికి కొత్త వడపోత(ఫిల్టర్)ను అభివృద్ధి చేశారు పరిశోధకులు. ఇది వైరస్ కణాలను అడ్డుకునే ఎన్95 మాస్కును మరింత శక్తిమంతంగా మార్చనుంది. ఈ ఫిల్టర్ను అవసరమైనప్పుడు మార్చుకోవచ్చని వెల్లడించారు. ఫలితంగా మాస్కులు ఎక్కువసారి వాడొచ్చని స్పష్టం చేశారు.
సాధారణ ఎన్95 మాస్కు కంటే ఫిల్టర్కు చిన్న రంధ్రాలు ఉంటాయని, అందువల్ల వైరస్ కణాలను సమర్థవంతంగా అడ్డుకోగలదని సౌదీ అరేబియాలోని కింగ్ అబ్దుల్లా యూనివర్శిటీ ఆఫ్ సైన్స్ అండ్ టెక్నాలజీ (కేఏయూఎస్టీ) పరిశోధకులు తెలిపారు.
85శాతం అడ్డుకుంటుంది!
ప్రస్తుతం అందుబాటులో ఉన్నవి అత్యున్నత స్థాయిలో రక్షణ కల్పించినప్పటికీ, వాటికి కొన్ని పరిమితులు ఉన్నాయని ఏసీఎస్ నానో జర్నల్లో పేర్కొన్నారు పరిశోధకులు. 300 నానోమీటర్లు కంటే చిన్నగా ఉన్న వైరస్ కణాలను ఎన్95 మాస్కు 85శాతం మాత్రమే అడ్డుకుంటుందని చెప్పారు. అయితే సార్స్కోవ్-2... 65 నుంచి 125 నానో మీటర్ల పరిమాణంలో ఉంటుందని తెలిపారు. దాని వల్ల కొన్ని వ్యాధికారక వైరస్లు ముక్కు, నోటిలోకి ప్రవేశించే అవకాశం ఉందన్నారు. తాజా ఫిల్టర్తో వాటిని కూడా అడ్డుకోవచ్చని తెలిపారు.
సాయం చేయాలనే..
మాస్కుల కొరత ఉన్నందు వల్ల వైద్య సిబ్బంది ఎన్95 మాస్కులను పదేపదే వాడుతున్నారు. ఈ సమస్యను అధిగమించడానికి సాయం చేయాలనే ఉద్దేశంతో.. వైరస్ కణాలను మరింత సమర్థవంతంగా అడ్డుకొనే ఫిల్టర్ను తయారు చేసినట్లు మహమ్మద్ ముస్తఫా, అతని సహచరులు తెలిపారు. ఎన్95 మాస్కు మార్చకుండా ఈ ఫిల్టర్ను మాత్రమే మార్చుకోవడం వల్ల కొరతను నివారించవచ్చని స్పష్టం చేశారు.
తొలుత రసాయనాలు, లిథియోగ్రఫీని ఉపయోగించి సూక్ష్మ రంధ్రాలు గల సిలికాన్ ఆధారిత ఫిల్టర్ అభివృద్ధి చేసినట్లు పరిశోధకులు తెలిపారు. తర్వాత 5 నుంచి 55 నానోమీటర్లు రంధ్రాల పరిమాణంలో ఫిల్టర్ తయారు చేయడానికి.. రియాక్టివ్ అయాన్ ఎటాచింగ్ అనే ప్రక్రియను ఉపయోగించినట్లు వెల్లడించారు.
ఇదీ చూడండి: కిమ్ జోంగ్ మళ్లీ మాయం- ఏం జరిగింది?
