అతికొద్ది రోజుల్లోనే అఫ్గానిస్థాన్లోని కీలక నగరాలను హస్తగతం చేసుకున్న తాలిబన్లు.. ఆదివారం రాజధాని కాబుల్లోకి ప్రవేశించారు. ప్రభుత్వంతో 'అధికార బదిలీ' అంశాన్ని చర్చించేందుకు యత్నిస్తున్నారు. ఇందులో భాగంగా.. ఆ దేశ అధ్యక్ష కార్యాలయానికి తాలిబన్ ప్రతినిధులు వెళ్తున్నారని అధికార వర్గాలు ఆదివారం తెలిపాయి.
కాబుల్ నగరాన్ని శాంతియుతంగా స్వాధీనం చేసుకోవడానికి తాము ఎదురు చూస్తున్నామని తాలిబన్ ప్రతినిధి సుహైల్ షహీన్ తెలిపారు. అయితే.. ఈ మేరకు అఫ్గాన్ ప్రభుత్వానికి, తమకు మధ్య ఏమైనా చర్చలు జరిగాయన్న విషయాన్ని మాత్రం ఆయన వెల్లడించలేదు.
"ఏ ఒక్కరి ప్రాణాలు, ఆస్తులు, గౌరవానికి హాని కలగదు. కాబుల్ ప్రజల ప్రాణాలను ప్రమాదంలో పడవేయం."
-తాలిబన్లు.
ఆ జిల్లాలు ముష్కరుల వశం..
అంతకుముందు... కాబుల్ శివార్లలోని కలాకన్, ఖారాబాఘ్, పఘ్మన్ జిల్లాలు ఇప్పటికే ముష్కరుల వశమైనట్లు అఫ్గానిస్థాన్ ప్రభుత్వాధికారులు ముగ్గురు అంతర్జాతీయ మీడియాకు వెల్లడించారు. మరోవైపు.. బాగ్రామ్ ఎయిర్ బేస్నూ అఫ్గాన్ బలగాలు.. తాలిబన్లకు అప్పగించాయి.
అఫ్గాన్లో నెలకొన్న అనిశ్చితి మధ్య.. అనేక మంది ప్రభుత్వ అధికారులు తమ కార్యాలయాల్ని వీడి వెళ్లారు.
తాము ప్రజల ప్రాణాలకు హాని కలిగించే చర్యలు చేపట్టబోమని తాలిబన్లు ప్రకటించినప్పటికీ.. అఫ్గాన్ ప్రజల్లో భయాలు వీడటం లేదు. విదేశాలకు తరలి వెళ్లేందుకు చాలా మంది కాబుల్ విమానాశ్రయానికి చేరుకుంటున్నారు.
కీలక పత్రాలను నాశనం చేసి..!
ఆదివారం అమెరికా రాయబార కార్యాలయం సమీపంలో.. హెలికాప్టర్లు, యుద్ధ విమానాలు ఎగురుతూ కనిపించాయి. కార్యాలయానికి చెందిన వాహనాలు ఆ ప్రాంతాన్ని వీడుతున్న దృశ్యాలు కనిపించాయి.
అయితే.. అఫ్గాన్ వీడి వెళ్లటంపై అమెరికా విదేశాంగ శాఖ ఇంకా స్పందించలేదు. అదే సమయంలో.. అమెరికా రాయబార కార్యాలయం వద్ద పొగ వెలువడుతున్నట్లు కనిపించింది. అమెరికా రాయబారులు.. సున్నితమైన అంశాలకు సంబంధించిన కీలక పత్రాలను నాశనం చేశారని ఇద్దరు అమెరికా సైనికాధికారులు తెలిపారు. ఈ ప్రాంతంతో పాటు ఇతర దేశాల రాయబారులు ఉన్న కార్యాలయాల వద్ద కూడా పొగ కనిపించింది.
ఎలాంటి ఘర్షణకు దిగకుండానే..
అఫ్గాన్లోని కీలక నగరం జలాలాబాద్ను ఆదివారం తెల్లవారు జామున ఆక్రమించారు తాలిబన్లు. దీంతో తూర్పు ప్రాంతానికి, దేశ రాజధాని కాబుల్కు మధ్య సంబంధాలు తెగిపోయాయి. జలాలాబాద్ నగరంలోని గవర్నర్ కార్యాలయాన్ని స్వాధీనం చేసుకున్న వీడియోలను సామాజిక మాధ్యమాల్లో పోస్ట్ చేశారు తాలిబన్లు. వారితో ఎలాంటి ఘర్షణకు దిగకుండానే.. భద్రతా దళాలు లొంగిపోయినట్లు ఓ అధికారి తెలిపారు.
అంచనాలను తలకిందులు చేస్తూ..
అఫ్గాన్లో సైనిక శిక్షణ కోసం ఎన్నో ఏళ్లుగా.. వందల కోట్లను అమెరికా ఖర్చు చేస్తున్నప్పటికీ.. ఆ దేశ బలగాలు తాలిబన్లకు అంత త్వరగా ఎందుకు తలొగ్గాయనే సందేహాలు వ్యక్తమవుతున్నాయి. అఫ్గాన్ రాజధానిని తాలిబన్లు ఆక్రమించుకోవడానికి నెలరోజుల సమయం పట్టే అవకాశముందని అమెరికాకు సైన్యం ఇటీవల అంచనా వేసింది. అయితే.. ఆ అంచనాలను తలకిందులు చేస్తూ.. అతికొద్ది రోజుల్లోనే తాలిబన్ల చేతుల్లోకి అఫ్గాన్ వెళ్లిపోయింది.
