Texas school shooting: అమెరికాలోని ఉవాల్డేలో దారుణం చోటు చేసుకుంది. స్థానిక ప్రాథమిక పాఠశాలలో 18 ఏళ్ల యువకుడు జరిపిన కాల్పుల్లో.. 18 మంది పిల్లలు సహా మరో ముగ్గురు మృతిచెందారు. మంగళవారం మధ్యాహ్నం ఒంటి గంట సమయంలో.. రాబ్ ఎలిమెంటరీ స్కూల్లో ఈ కాల్పులు జరిగినట్లు టెక్సాస్ గవర్నర్ గ్రెగ్ అబాట్ తెలిపారు. టెక్సాస్ రాష్ట్ర చరిత్రలో.. ఇదే అత్యంత దారుణమైన కాల్పుల ఘటన అని ఆయన చెప్పారు. కాల్పులకు పాల్పడిన నిందితుడు స్థానికుడైన సాల్వడోర్ రామోస్గా పోలీసులు గుర్తించారు.
నిందితుడు రామోస్.. పోలీసులు జరిపిన ఎదురుకాల్పుల్లో మృతిచెందాడు. ఈ క్రమంలో ఇద్దరు అధికారులకు తూటా గాయాలు అయినట్లు పోలీసు అధికారి పీట్ అర్రెడోండో పేర్కొన్నారు. ఉవాల్డే కాల్పుల ఘటన నేపథ్యంలో.. రాబ్ స్కూల్‌ను భారీ సంఖ్యలో పోలీసులు చుట్టుముట్టారు. ఎఫ్బీఐ అధికారులు సైతం.. రంగంలోకి దిగారు. కాల్పులకు కారణాలు తెలుసుకునేందుకు దర్యాప్తు చేస్తున్నారు. మృతిచెందిన చిన్నారులు 5 నుంచి 11 ఏళ్ల మధ్య వారని తెలిపారు. అయితే ఈ చిన్నారులకు సంబంధించిన మరిన్ని వివరాలు తెలియాల్సి ఉంది.
నాయనమ్మను చంపి..: నిందితుడు ఈ కాల్పులకు పాల్పడేందుకు ముందే పథకం వేశాడని.. తన 18వ పుట్టినరోజు నాడు ఇందుకోసం రెండు రైఫిళ్లను కొనుగోలు చేశాడని అధికారులు వెల్లడించారు. స్కూల్లో కాల్పులు జరిపేందుకు ముందు అతని నాయనమ్మను కూడా కాల్చి చంపాడని తెలిపారు. అతను ఈ దారుణాలకు పాల్పడడానికి వెనుక కారణాలు తెలియాల్సి ఉందని పేర్కొన్నారు.
ఆసియా పర్యటన ముగించుకుని తిరుగుపయనమైన అమెరికా అధ్యక్షుడు జో బైడెన్‌కు ఈ ఘటన గురించి తెలుసుకుని దిగ్భ్రాంతికి గురయ్యారు. 'ఆయుధాల వినియోగంపై ఆంక్షలు విధించాల్సిన అవసరం ఉంది.. ఇలాంటి మారణహోమాలు జరిగేందుకు మనం ఎందుకు అవకాశం ఇస్తున్నాం?' అని ప్రశ్నించారు. అమెరికాలోని అన్ని ప్రభుత్వ భవనాలు, మిలటరీ స్థావరాలు, నావల్ స్టేషన్స్, అమెరికా రాయబార కార్యాలయాల వద్ద జాతీయ జెండాను మే28 సాయంత్రం వరకు అవనతం చేయాలని ఆదేశించారు.
ఇదీ చూడండి: సూపర్ మార్కెట్లో దుండగుడి కాల్పులు.. 10 మంది మృతి
