అమెరికాలో 2007లో కొన్న ఫస్ట్ జనరేషన్ ఐఫోన్ మోడల్ ప్రస్తుతం రూ.52లక్షలకు (63వేల డాలర్లు) అమ్ముడుపోయింది. ఎల్సీజీ హౌస్ వేసిన వేలం పాటలో ఈ పాత ఫోన్ను కొనేందుకు ఎగబడ్డారు. ఇన్వెస్టర్లు, పాత ఫోన్లు సేకరించే వారు పెద్ద ఎత్తున ఈ వేలంలో పాల్గొన్నారు. 50వేల డాలర్లు వస్తాయని ముందుగా అంచనా వేయగా.. ఈ ఫోన్ ఏకంగా 63 వేల డాలర్లకు పైగా రాబట్టింది.
ఫోన్ ఎవరిదంటే?
16 సంవత్సరాల క్రితం టాటూ ఆర్టిస్ట్ కరెన్ గ్రీన్కు తన స్నేహితులు ఈ ఐఫోన్ను గిప్ట్గా ఇచ్చారు. 2007లో కొత్తగా ఉద్యోగం వచ్చినప్పుడు కరెన్ స్నేహితులు ఆమెకు కానుకగా.. ఫస్ట్ జనరేషన్ ఐఫోన్ను ఇచ్చారు. దానిని ఆమె ఆమె ఉపయోగించకుండా.. సీల్ తీయకుండా దాచి పెట్టి ఉంచింది. ఆమె అప్పటికే సాధారణ ఫోన్ను వాడుతోంది. స్మార్ట్ఫోన్కు మారాలంటే.. ఏటీ అండ్ టీ నెట్వర్క్కు మారాలి. అది ఇష్టం లేక కరెన్.. స్మార్ట్ఫోన్ను ఉపయోగించకుండా ఉండిపోయింది. కనీసం ఫోన్ బాక్స్ సీల్ కూడా తీయకుండా జాగ్రత్తగా దాచిపెట్టింది. తర్వాత దాని సంగతే మర్చిపోయింది.
అయితే, సీల్ తీయని ఫోన్లకు ఎక్కువ విలువ ఉంటుందని కొన్ని రోజుల తర్వాత తెలుసుకుంది కరెన్. 2019లో 'ద డాక్టర్ అండ్ ద దీవా' షోలో ఆ ఫోన్ విలువ 5వేల డాలర్లు ఉంటుందని అంచనా వేశారు. దీంతో కరెన్.. వేలం నిర్వాహకులను సంప్రదించింది. ఈమె 'ఎల్సీజీ ఆక్షన్స్' అనే వెబ్సైట్లో ఫిబ్రవరి2న ఫోన్ను వేలానికి పెట్టింది. 50వేల డాలర్లు వస్తాయని అని తొలుత కంపెనీ అంచనా వేసింది. అయితే, దానికి ఊహించిన దానికంటే అధిక స్పందన వచ్చింది.
'ఐఫోన్ కొత్త ఫీచర్లతో చాలా బాగుంది. కనీసం ఫోన్ డబ్బా అంచులు కూడా పాడవకుండా చాలా షార్ప్గా ఉన్నాయి. మంచి కలర్తో చెక్కు చెదరకుండా ఉంది. పాత ఫోన్లను కలెక్ట్ చేసుకోవాలి అనుకునేవారికి ఇది ఒక గొప్ప ఫోన్' అని చెబుతూ కరెన్ గ్రీన్.. తన ఫోన్ను వేలానికి పెట్టింది. వేలంలో ప్రారంభ ధర 2,500 డాలర్లుగా నిర్ణయించారు. వేలం పాటలో 27 బిడ్ల తర్వాత ఈ ఐఫోన్కు అనూహ్యంగా 63,356.40 డాలర్లు (దాదాపు రూ.52,47,303) వచ్చాయి. 599డాలర్లకు కొన్న ఫోన్ ప్రస్తుతం 63వేల డాలర్లకు వేలంలో అమ్ముడు పోయిన నేపథ్యంలో అందరూ షాక్కు గురయ్యారు. తొలి తరం ఐఫోన్గా వచ్చిన ఈ స్మార్ట్ఫోన్.. 2జీ నెట్వర్క్తో పనిచేస్తుంది. 4జీబి, 8జీబి,16జీబి స్టోరేజ్తో మార్కెట్లోకి వచ్చింది.
