Ukraine news: ఉక్రెయిన్‌పై సైనికచర్య ప్రారంభించిన దాదాపు రెండునెలల తర్వాత రష్యా కీలక ప్రకటన చేసింది. స్టీల్ ప్లాంటు మినహా మరియుపోల్ నగరం పూర్తిగా తమ వశమైనట్లు రష్యా అధ్యక్షుడు వ్లాదిమిర్ పుతిన్‌ ఓ ప్రకటన చేశారు. రష్యా రక్షణ మంత్రి సెర్గీ షోయిగుతో భేటి అయిన పుతిన్‌.. మరియుపోల్ విమోచనం కోసం చేపట్టిన సైనికచర్య విజయవంతం కావటం గొప్ప విషయమని ప్రశంసించారు. అక్కడి పారిశ్రామికప్రాంతంపై దాడులు చేయాల్సిన అవసరం ఏమాత్రం లేదని పుతిన్‌ అన్నట్లు అంతర్జాతీయ మీడియా కథనాలు పేర్కొన్నాయి. అజోవ్‌స్తల్ స్టీల్ ప్లాంట్‌పై దాడులకు బదులు ఈగ కూడా తప్పించుకోలేనంతగా బ్లాక్‌ చేయాలని సైన్యాన్ని ఆదేశించారు. భారీ వైశాల్యంతో ఉన్న ఆ ప్లాంట్‌లో సుమారు 2వేల మంది ఉక్రెయిన్ సైనికులు ఉన్నట్లు గతంలో రష్యా రక్షణ శాఖ ప్రకటించింది. స్టీల్ ప్లాంట్‌లోని ఉక్రెయిన్ సైనికులు లొంగిపోవాలని.. వారికి ఎలాంటి హాని చేయకుండా వైద్యసాయం అందిస్తామని రష్యా హామీ ఇచ్చింది.
మరియుపోల్‌లో చిక్కుకున్న ప్రజలను తరలించేందుకు మానవతా కారిడార్‌ కింద బస్సులను పంపుతున్నట్లు ఉక్రెయిన్ అధికారులు తెలిపారు. 4బస్సులు మరియుపోల్ నుంచి బయలుదేరినట్లు ఉక్రెయిన్ ఉపప్రధాని తెలిపారు. కనికరం లేని రష్యా దాడుల్లో వేలాది మంది చిక్కుకొన్నారని పేర్కొన్నారు. రష్యా వశం కావటంతో ప్రజలు ఇతర ప్రాంతాలకు వెళ్తున్నారు. లుహాన్స్క్‌ నగరంపైనా పుతిన్‌ సేనలు పట్టు సాధించాయి. ఇప్పటివరకు 60శాతానికిపైగా ప్రాంతాన్ని అధీనంలోకి తీసుకున్నట్లు తెలుస్తోంది.
ఉక్రెయిన్ సేనలు తిరిగి తమ అధీనంలోకి తీసుకున్న ప్రాంతాల్లో.. మాస్కో సేనలు జరిపిన విధ్వంసకాండ బయటపడుతోంది. కీవ్‌ శివారు ప్రాంతాల్లో మరో తొమ్మిది మృతదేహాలను గుర్తించినట్లు ఉక్రెయిన్ పోలీసులు తెలిపారు. వారిని చిత్రవధ చేసి చంపినట్లు ఆనవాళ్లు ఉన్నాయని పేర్కొన్నారు. ఇప్పటివరకు కీవ్‌కు శివారు ప్రాంతాల్లో 1020 మృతదేహాలను గుర్తించినట్లు ఉక్రెయిన్ అధికారులు వెల్లడించారు. మరోవైపు మరియుపోల్ వేదికగా రష్యాతో ప్రత్యేక చర్చలు జరిపేందుకు సిద్ధంగా ఉన్నట్లు ఉక్రెయిన్ చర్చల ప్రతినిధులు ప్రకటించారు. షరతులు లేని చర్చలకు సిద్ధమన్నారు. అంతకుముందు శాంతిచర్చలకు సంబంధించి రష్యా నుంచి తమకు ఎలాంటి ముసాయిదా అందలేదని ఉక్రెయిన్ ప్రకటించటం విశేషం..
ఇదీ చదవండి: 'నాటోలో చేరొద్దు'.. ఆ దేశాలకు రష్యా స్ట్రాంగ్ వార్నింగ్!
