పాకిస్థాన్లో దారుణం జరిగింది. పోలీస్ స్టేషన్ లక్ష్యంగా జరిగిన ఆత్మాహుతి దాడిలో 8 మంది పోలీసులు సహా 12మంది దుర్మరణం చెందారు. దాదాపు 50 మంది దాకా గాయపడ్డారు. ఖైబర్ పఖ్తుంఖ్వా రాష్ట్రంలోని స్వాత్ వ్యాలీ జిల్లా కబాల్ ఠాణా వద్ద ఈ ఘటన జరిగింది. మొదట చిన్న బాంబు పేలిందని.. ఆ తర్వాత ఎక్కువ సామర్థ్యమున్న బాంబు పేలిందని పోలీసు ఉన్నతాధికారి అతౌల్లా ఖాన్ తెలిపారు. ఘటనా స్థలంలో పలు కార్లు ధ్వంసమయ్యాయి. చెట్లు నేలమట్టమయ్యాయి. రక్తపు మరకలతో ఉన్న క్షతగాత్రులను ఆస్పత్రికి తరలించారు. అయితే, ఈ పేలుళ్లకు ఇప్పటివరకు ఎవరూ బాధ్యత వహించలేదు.
అంతకుముందు.. పోలీస్ స్టేషన్లో జరిగిన 2 పేలుళ్లతో భవనం పూర్తిగా ధ్వంసమైనట్లు అధికారులు వెల్లడించారు. పోలీసులు కొందరు శిథిలాల కింద ప్రాణాలు కోల్పోయారని.. గాయపడినవారిని సమీపంలోని ఆస్పత్రులకు తరలించినట్లు తెలిపారు. ఈ దాడి కారణంగా స్థానిక ఆస్పత్రుల్లో ఎమర్జెన్సీ ప్రకటించామని.. విద్యుత్ అంతరాయం కూడా ఏర్పడిందని తెలిపారు.
ఈ దాడితో ఖైబర్ పఖ్తుంఖ్వా ప్రావిన్స్లో హైఅలర్ట్ ప్రకటించారు. ఈ దాడికి ఏ ఉగ్రసంస్థ బాధ్యత తీసుకోనప్పటికీ.. ప్రభుత్వంతో కాల్పుల విరమణ ఒప్పందం ముగిసిన తర్వాత పాకిస్థానీ తాలిబన్లు ఈ తరహా దాడులకు తెగబడుతున్నారు. దీంతో తాజా దాడి వారి పనేనన్న అనుమానాలు వ్యక్తమవుతున్నాయి. దాడి జరిగిన పోలీస్ స్టేషన్లో సమీపంలో ఒక కౌంటర్ టెర్రరిజం విభాగ కార్యాలయం, ఓ మసీదు ఉందని పోలీసులు తెలిపారు.
ఇదే ఖైబర్ పంఖ్తుంక్వా రాష్ట్రంలోని.. లక్కి మర్వాట్ జిల్లాలో కౌంటర్ టెర్రరిజం విభాగం చేపట్టిన ఆపరేషన్లో ముగ్గురు ఉగ్రవాదులతో పాటు ఓ పోలీసు అధికారి మృతి చెందారు. ఈ ఆపరేషన్ జరిగిన గంటల వ్యవధిలో ఈ పేలుళ్లు సంభవించడం చర్చనీయాంశమైంది.
పాకిస్థాన్ అంతర్గత వ్యవహారాల మంత్రి రాణా సనావుల్లా పేలుళ్లను ఖండించారు. ఈ ఘటనలో మృతి చెందిన వారి పట్ల విచారం వ్యక్తం చేశారు. ఇలాంటి ఉగ్రదాడులను త్వరలో నిర్మూలిస్తామని చెప్పారు. ఇక, ఖైబర్ పఖ్తుంఖ్వా తాత్కాలిక ముఖ్యమంత్రి మహ్మద్ అజామ్ కూడా ఈ పేలుళ్లను తీవ్రంగా ఖండించారు. సహాయక చర్యలు వేగవంతం చేయాలని అధికారులను అదేశించారు. విధి నిర్వహణలో అమరులై పోలీసులకు తమ ప్రభుత్వం అండగా ఉంటుందని హామీ ఇచ్చారు.
కాగా, పాకిస్థాన్లో ఉగ్రవాద ఘటనలు రోజురోజుకు ఎక్కువవుతున్నాయి. పోలీసులు, భద్రతా దళాలే లక్ష్యంగా ఉగ్రవాదులు దాడులు జరుపుతున్నారు. వీటిని దీటుగా ఎదుర్కొనేందుకు భద్రతా దళాలు కూడా పలు ఆపరేషన్లు చేపడుతున్నాయి.
