వచ్చే ఏడాది జరగనున్న అమెరికా అధ్యక్ష ఎన్నికల్లో పోటీచేయడం కోసం భారతీయ అమెరికన్, దక్షిణ కరోలినా గవర్నర్‌ నిక్కీ హెలీ రిపబ్లికన్‌ పార్టీ అభ్యర్థిత్వ బరిలోకి దిగుతున్నారు. అమెరికా మాజీ అధ్యక్షుడు డొనాల్డ్‌ ట్రంప్‌తో ఆమె అభ్యర్థిత్వం కోసం పోటీపడతారు. ఇందుకోసం నిక్కీహెలీ మంగళవారం నుంచే తన అభ్యర్థిత్వ ప్రచారాన్ని ప్రారంభించారు.
ఈ సందర్భంగా ఓ వీడియో సందేశం ఇస్తూ.. "భారత సంతతీయుల కుమార్తెగా నేను గర్వపడుతున్నాను. తెలుపు, నలుపు లేదు. నీ పని.. తేడాలపై కాదు సారూప్యతలపై చూపించమని మా అమ్మ ఎప్పుడూ చెబుతుంటుంది. మన ఆలోచనలను కొందరు జాత్యాహంకారంగా భావిస్తారు. కానీ సత్యానికి మించినది ఏదీ లేదు. చైనా, రష్యాలు కవాతు చేస్తున్నాయి. వాళ్లంతా మనల్ని వేధించవచ్చు అనుకుంటున్నారు. కానీ నేను బెదిరింపులకు భయపడను. మీరు దెబ్బ కొట్టాలని చూస్తే అదే మీకు బలంగా తాకుతుంది. ఆర్థిక బాధ్యత, సరిహద్దు భద్రత, దేశ పటిష్ఠత కోసం కొత్త తరం నాయకత్వానికి సమయం ఆసన్నమైంది. మరో జోబైడెన్‌ మనకు వద్దు. దేశాన్ని మరింత గొప్పగా, స్వేచ్ఛగా మార్చే అవకాశాలు ఇంకా ఉన్నాయి. క్లిష్ట పరిస్థితిల్లో కూడా అమెరికా మమ్మల్ని చేరదీసింది. దక్షిణ కరోలినాలో పుట్టి, పెరగడం ద్వారా దేశ గొప్పతనం తెలిసింది" అని అన్నారు.
పోరాట యోధురాలు నిక్కీ..
నిక్కీ హెలీని రాజకీయ పండితులు తొలి నుంచి తక్కువ అంచనా వేస్తూ వచ్చారు. కానీ ప్రతిసారి తను విజయం సాధిస్తూ వారి అంచనాలను పటాపంచలు చేశారు. అజిత్‌ సింగ్‌ రణ్‌ధావా, రాజ్‌కౌర్‌ రణ్‌ధావా అనే సిక్కు దంపతులకు జన్మించారు నిక్కీహెలీ. తండ్రి పంజాబ్‌ వ్యవసాయ వర్సిటీ ప్రొఫెసర్‌గా సేవలు అందించారు. తల్లి దిల్లీ వర్సిటీ నుంచి లా పూర్తి చేశారు. భారత్‌లోని పంజాబ్‌ నుంచి కెనడాకు వలస వచ్చిన వారు.. 1960లో అమెరికాలో స్థిరపడ్డారు. క్లెమ్‌సన్‌ వర్సిటీ నుంచి అకౌంటింగ్‌ డిగ్రీ పట్టా పొందిన ఆమె.. దుస్తుల వ్యాపారం చేశారు. రాజకీయాల్లోకి రాకముందు నేషనల్‌ అసోసియేషన్‌ ఆఫ్‌ వుమెన్‌ బిజినెస్‌ ఓనర్స్‌ అధ్యక్షురాలిగా పని చేశారు. అతిచిన్న వయసులోనే(39) అగ్రరాజ్యంలో గవర్నర్‌గా నిక్కీ బాధ్యతలు స్వీకరించారు. దక్షిణ కరోలినా తొలి మహిళా గవర్నర్‌గా నియమితులయ్యారు.
వ్యాపారవేత్త వివేక్‌ రామస్వామి సైతం సై
2024లో జరిగే అమెరికా అధ్యక్ష అభ్యర్థిత్వ ఎన్నికల్లో రిపబ్లికన్‌ పార్టీ తరఫున పోటీ చేయాలని వ్యాపారవేత్త వివేక్‌ రామస్వామి భావిస్తున్నారు. భారత్‌ నుంచి అమెరికాకు వచ్చిన దంపతులకు జన్మించిన రామస్వామి.. హార్వర్డ్‌, యేల్‌ విశ్వవిద్యాలయాల్లో చదువు పూర్తిచేశారు.
