న్యూయార్క్లో విషాద ఘటన జరిగింది. ఇంటి సమీపంలో కారులో కూర్చున్న భారతి సంతతికి చెందిన ఓ వ్యక్తిని దుండుగుడు కాల్చి చంపాడు. బాధితుడ్ని సత్నామ్సింగ్గా పోలీసులు గుర్తించారు. కేసు నమోదు చేసి ఘటనపై దర్యాప్తు చేపడతున్నామని తెలిపారు.
ఇదీ జరిగింది.. న్యూయార్క్ రిచ్మండ్ హిల్లో నివాసం ఉంటున్న భారత సంతతి వ్యక్తి సత్నామ్సింగ్.. శనివారం కారులో షికారు చేద్దామనుకున్నాడు. తన దగ్గర కారు లేకపోవడం వల్ల స్నేహితుడి దగ్గర అడిగి తెచ్చుకున్నాడు. ఆ తర్వాత.. తన ఇంటి ఆవరణలో కారు పార్క్ చేసి అందులో కూర్చున్నాడు. అంతలోనే మృత్యువు ఓ దుండగుడి రూపంలో వచ్చింది. కారులో కూర్చున్న సత్నామ్ సింగ్ను దుండగుడు కాల్చి చంపి పారిపోయాడు. కాసేపటికి గమనించిన స్థానికులు.. బాధితుడ్ని స్థానిక ఆసుపత్రికి తీసుకెళ్లారు. వైద్యులు పరీక్షించి అప్పటికే అతడు మరణించినట్లు నిర్ధరించారు. సమాచారం అందుకున్న పోలీసులు.. కేసు నమోదు చేసి దర్యాప్తు చేపడుతున్నారు.
అయితే దుండుగుడి లక్ష్యం మృతి చెందిన వ్యక్తి కాదని, కారు యజమాని అయి ఉండొచ్చని పోలీసులు అనుమానిస్తున్నారు. కానీ, పోలీసుల తీరుపై స్థానికులు అనుమానం వ్యక్తం చేస్తున్నారు.
ఏప్రిల్ నెలలో రిచ్మండ్ హిల్లో జరిగిన వేర్వేరు ఘటనల్లో ఇద్దరు సిక్కుల తలపాగాలను తీసేసి మరీ కొందరు దుండగులు దాడి చేశారు. ఆ ఘటనలకు సంబంధించి ఇద్దరు వ్యక్తులను పోలీసులు అరెస్టు చేసి కేసు నమోదు చేశారు.
ఇవీ చదవండి: బుల్ఫైట్లో కుప్పకూలిన స్టాండ్.. నలుగురు మృతి.. వందల మందికి గాయాలు
