శుక్రవారమే ఆ నాలుగు ప్రాంతాలు రష్యాలో విలీనం.. వారి హెచ్చరికలు బేఖాతరు

ఉక్రెయిన్​కు చెందిన నాలుగు భూభాగాల్లో రెఫరెండం నిర్వహించిన రష్యా.. వాటిని తమ దేశంలో అధికారికంగా విలీనం చేసుకుంటామని ప్రకటించింది. శుక్రవారం క్రెమ్లిన్​ సెయింట్​ జార్జ్​ హాల్​లో జరిగే ఈ కార్యక్రమంలో ఆయా ప్రాంతాల రష్యా అనుకూల ప్రతినిధులు ఒప్పందాలపై సంతకం చేస్తారని అధికారులు తెలిపారు. అయితే విలీనం చేసుకుంటే తీవ్ర పరిణామాలు తప్పవని అమెరికా సారథ్యంలోని నాటో ఘాటుగా హెచ్చరించినా.. రష్యా తగ్గడం లేదు.

ఉక్రెయిన్‌పై రష్యా సాగిస్తున్న యుద్ధం.. మరో భారీ విధ్వంసానికి దారితీసేలా మలుపు తీసుకుంటోంది. నాలుగు ఉక్రెయిన్‌ భూభాగాలను ప్రజాభిప్రాయం మేరకు అధికారికంగా శుక్రవారం తమ దేశంలో కలిపేసుకుంటున్నట్టు రష్యా ప్రకటించింది. విలీనం చేసుకుంటే తీవ్ర పరిణామాలు తప్పవని అమెరికా సారథ్యంలోని నాటో ఘాటుగా హెచ్చరించినా.. రష్యా తగ్గడం లేదు.

ఉక్రెయిన్​లోని దొనెత్స్క్‌, లుహాన్స్క్‌, జపోరిజియా, ఖేర్సన్‌ ప్రాంతాలను అధికారికంగా రష్యాలో విలీనం చేసుకునే కార్యక్రమంలో అధ్యక్షుడు వ్లాదిమిర్​ పుతిన్​ పాల్గొంటారని అధికార ప్రతినిధి డిమిత్ర పెస్కోవ్​ గురువారం తెలిపారు. క్రెమ్లిన్​ సెయింట్​ జార్జ్​ హాల్​లో జరిగే ఈ కార్యక్రమంలో ఆయా ప్రాంతాల రష్యా అనుకూల ప్రతినిధులు ఒప్పందాలపై సంతకం చేస్తారని పెస్కోవ్​ చెప్పారు. ఈ పరిణామాల నేపథ్యంలో.. రష్యా వ్యతిరేక దేశాలు ఆంక్షల కత్తికి పదును పెడుతున్నాయి. శుక్రవారం నుంచి రష్యన్​ పర్యటకులను తమ దేశంలోకి రాకుండా నిషేధిస్తామని ఫిన్లాండ్​ ప్రకటించింది.

ఆ నాలుగు ప్రాంతాల వాటా 15 శాతం..
భారీ ప్రాణ, ఆస్తి నష్టంతో ఉక్కిరిబిక్కిరి అవుతున్న ఉక్రెయిన్‌కు దొనెత్స్క్‌, లుహాన్స్క్‌, జపోరిజియా, ఖేర్సన్‌.. రష్యాలో విలీనం కావడం మరో భారీ దెబ్బ అవుతుంది. ఉక్రెయిన్‌ మొత్తం భూభాగంలో ఈ నాలుగు ప్రాంతాల వాటా 15 శాతం. ఇది హంగేరీ లేదా పోర్చుగల్‌ భూభాగంతో సమానం. వీటికి క్రిమియాను కూడా కలిపితే అమెరికాలోని పెన్సిల్వేనియా రాష్ట్ర మంత భూభాగంతో సమానమవుతుంది.

'భారీ సంఖ్యలో ఉక్రెయిన్​ ప్రజలు మద్దతు'
ఉక్రెయిన్‌కు చెందిన నాలుగు భూభాగాలు దొనెత్స్క్‌, లుహాన్స్క్‌, జపోరిజియా, ఖేర్సన్‌ను ఆక్రమించిన రష్యా ఈ నెల 23 నుంచి 27 మధ్య అక్కడ రెఫరెండం నిర్వహించింది. రష్యాలో విలీనానికి అక్కడిని ప్రజలు భారీ సంఖ్యలో మద్దతు తెలిపారని ప్రజాభిప్రాయ సేకరణ ఫలితాలను రష్యా నియమించిన యంత్రాంగం ప్రకటించింది.

'అదొక బూటకం.. ఉక్రెయిన్​కు అండగా ఉంటాం..'
అయితే ఈ ప్రజాభిప్రాయ సేకరణను బూటకంగా అమెరికా సారథ్యంలోని నాటో దేశాలు అభివర్ణించాయి. ఈ విషయంలో ఉక్రెయిన్‌కు అండగా ఉంటామని భరోసానిచ్చాయి. ప్రజలెవరూ స్వేచ్ఛగా ఓటు వేసే పరిస్థితులు లేవని, రెఫరెండాన్ని అంగీకరించే సమస్యే లేదని స్పష్టం చేశాయి. ఆ ప్రాంతాలను రష్యాలో విలీనం చేసుకుంటే తీవ్ర పరిణామాలు తప్పవని హెచ్చరించినా.. పుతిన్‌ వెనక్కి తగ్గడం లేదు. ఇరుపక్షాలు పరస్పరం అణు హెచ్చరికలు చేసుకోవడం ఉద్రిక్తతలను మరింత పెంచాయి.

విలీనం తర్వాత దొనెత్స్క్‌, లుహాన్స్క్‌, జపోరిజియా, ఖేర్సన్‌... రష్యాలో భాగం కానున్నాయని వాటిపై దాడిని రష్యాపై దాడిగానే పరిగణిస్తామని పుతిన్‌ యంత్రాంగం ఇప్పటికే ప్రకటించింది. వాటిని కాపాడుకునేందుకు అణుబాంబులు వేయడానికైనా సిద్ధమని హెచ్చరించింది. రష్యా అణు దాడికి దిగితే భారీ మూల్యం చెల్లించుకోవాల్సి వస్తుందని అమెరికా కూడా హెచ్చరికలు పంపింది. ఇరుపక్షాల నోటా అణ్వస్త్రాల మాట వినిపిస్తున్న వేళ తాజా పరిణామం ఎక్కడకు దారితీస్తుందోనన్న ఆందోళన ప్రపంచానికి వణుకు పుట్టిస్తోంది.

క్రిమియా ఆక్రమించే సమయంలోనూ..
2014లో క్రిమియాను ఆక్రమించే సమయంలోనూ రష్యా మొదట దాడులకు దిగింది. ఆ తర్వాత అక్కడ రెఫరెండం చేపట్టి, విలీనం చేసుకుంది. అమెరికా, నాటోలు అప్పట్లో హెచ్చరికలకే పరిమితం అయ్యాయి తప్ప, ఏమీ చేయలేకపోయాయి. ఇప్పుడు మాత్రం ఆ దేశాలు తమను ఏం చేయగలవన్నది పుతిన్‌ ధీమాగా విశ్లేషకులు చెబుతున్నారు.

విలీనం అయ్యాక నాటో దళాలు అడుగు కూడా..
ఉక్రెయిన్‌ భూభాగాలు రష్యాలో విలీనమైనట్టు పుతిన్‌ ప్రకటించిన తర్వాత.. నాటో దళాలు ఇక అక్కడ అడుగు పెట్టలేవు. ఒకవేళ అందుకు విరుద్ధంగా జరిగితే మాత్రం.. పరిస్థితి ఒక్కసారిగా తీవ్ర ఉద్రిక్తంగా మారిపోతుంది. అది అణు యుద్ధానికి దారితీసే ప్రమాదం ఉంది. ఇది మరింత ముదిరితే.. మూడో ప్రపంచ యుద్ధం తప్పకపోవచ్చన్న అమెరికా అధ్యక్షుడు జో బైడెన్‌ మాటలు నిజం కావచ్చు. విలీన ప్రకటన తర్వాత రష్యాపై అమెరికా, ఐరోపా దేశాలు అత్యంత కఠిన ఆంక్షలు విధించేందుకు సిద్ధమవుతున్నాయి.

మరోవైపు తమ గడ్డ నుంచి చివరి రష్యన్‌ సైనికుడిని తరిమేసేంత వరకూ విశ్రమించబోమని ఉక్రెయిన్‌ తెగేసి చెబుతోంది. తమ భూభాగంపై రష్యా ఆధిపత్యాన్ని ససేమిరా సహించబోమని చెప్పింది. మాస్కోపై పోరాడేందుకు ఆయుధాలు ఇవ్వాలంటూ పశ్చిమ దేశాలను కోరుతోంది. ఈ పరిణామాలు ఎటువైపునకు దారి తీస్తాయోనని ప్రపంచ దేశాలు తీవ్ర ఆందోళన చెందుతున్నాయి.

ఇవీ చదవండి: భారతీయులకు గుడ్​న్యూస్​.. ఇక మరింత ఈజీగా గ్రీన్​ కార్డ్.. సెనేట్​లో బిల్!