తెగిన కేబుల్​ కార్​ వైర్​​.. 900 అడుగుల ఎత్తులో విద్యార్థులు.. టెన్షన్​ టెన్షన్​!

8 People Trapped in Cable Car Pakistan : ఓ కేబుల్‌ కార్​లో ఆరుగురు చిన్నారులతో సహా ఎనిమిది మంది చిక్కుకుపోయారు. లోయను దాటేందుకు వినియోగించే ఈ కేబుల్​ కారు.. 900 అడుగుల ఎత్తులో ఆకస్మికంగా తెగిపోయింది. పాకిస్థాన్​లో ఈ ఘటన జరిగింది. అనంతరం రంగంలోకి దిగిన పాకిస్థాన్​ ఆర్మీ ఇద్దరు చిన్నారులను రక్షించింది.

8 People Trapped in Cable Car Pakistan : భూమికి 900 అడుగుల ఎత్తులో ఓ కేబుల్‌ కార్‌లో ఆరుగురు పిల్లలు సహా ఇద్దరు వ్యక్తులు చిక్కుకున్న ఘటన పాకిస్థాన్‌లో జరిగింది. ఖైబర్ పఖ్తుంక్వా ప్రావిన్స్‌ బట్టగ్రామ్ జిల్లాలో ఈ ప్రమాదకర ఘటన జరిగింది. 10 నుంచి పదిహేనేళ్ల వయసున్న పిల్లలు పాఠశాలకు కేబుల్ కార్‌లో వెళుతుండగా అందులోని ఓ కేబుల్ తెగిపోయింది. దీంతో భూమికి.. ఆకాశానికి మధ్య భయంకరమైన స్థితిలో కేబుల్‌ కారు వేలాడుతోంది.

Pakisthan Cable Car Incident Today : సమాచారం అందుకున్న అధికారులు 2 ఆర్మీ హెలికాఫ్టర్లను రప్పించి.. కేబుల్‌ కార్‌లో చిక్కుకున్న వారిని కాపాడే ప్రయత్నం చేస్తున్నారు. తీవ్రమైన గాలులు వీస్తుండటం, రాత్రి సమయం కావడంతో చిక్కుకున్న వారిని కాపాడాటం అత్యంత ప్రమాదకరంగా మారినట్లు అధికారులు తెలిపారు. ప్రస్తుతం ఆర్మీ అధికారులు హెలికాఫ్టర్​ సాయంతో ఇద్దరు చిన్నారులను రక్షించారని అధికారులు పేర్కొన్నారు. మిగతా వారికి కూడా కాపాడేందుకు ప్రయత్నిస్తున్నట్లు వారు వెల్లడించారు. కొండ ప్రాంతం కావడం వల్ల ఒక వైపు నుంచి మరో వైపు వెళ్లేందుకు ప్రజలు తరచుగా కేబుల్ కార్లను ఉపయోగిస్తారని అధికారులు పేర్కొన్నారు.

అక్కడి మీడియా కథనాల ప్రకారం.. ఆ ప్రాంతంలో నివసించే ప్రజలు.. ఒక చోటు నుంచి మరొక చోటుకు వెళ్లాలంటే ఈ లోయను దాటాల్సి ఉంటుంది. ఇందుకోసం నిత్యం వారు ఈ కేబుల్‌ కారును ఉపయోగిస్తున్నారు. ఘటన గురించి కారులో ఉన్న ఓ వ్యక్తి ఫోను ద్వారా స్థానిక మీడియాకు వెల్లడించారు. "మేము ప్రయాణిస్తున్న సమయంలో కేబుల్‌ కారు ఒక్కసారిగా ఆగిపోయింది. చిన్నారులతో సహా మేమంతా ఇక్కడ చిక్కుకుపోయాం. ఒక వ్యక్తి భయంతో స్పృహ కోల్పోయాడు. ఉదయం ఏడు గంటల నుంచి ఇక్కడే ఉండిపోయాం. ఇక్కడ పరిస్థితి ఏం బాలేదు. మా సమీపంలో ఒక హెలికాఫ్టర్‌ తిరిగింది కానీ.. ఎలాంటి సహాయం మాకు చేయకుండా వెళ్లిపోయింది. ఆ దేవుడే మమ్మల్ని కాపాడాలి." అంటూ ఆ వ్యక్తి వాపోయాడు.