WHO Quarantine: కరోనా బారినపడిన వారు ఐదు నుంచి ఏడు రోజుల్లోనే కోలుకుంటున్నప్పటికీ.. క్వారంటైన్ సమయాన్ని 14 రోజుల పాటు కొనసాగించటమే మేలని ప్రపంచ ఆరోగ్య సంస్థ తెలిపింది. అయితే పరిస్థితులను బట్టి ఈ గడువు ఎన్నిరోజులు ఉండాలనే నిర్ణయం ఆయా దేశాలే తీసుకోవాలని సూచించింది. ఈమేరకు డబ్ల్యూహెచ్ఓ కొవిడ్ నిర్వహణ మద్దతు బృందంలోని సభ్యుడు అబ్ది మహముద్ మీడియాకు తెలిపారు. ప్రజలు ఇన్ఫ్ల్యూయెంజాతో పాటు కరోనా బారినపడే అవకాశాలు ఉన్నాయని చెప్పారు.
"ఇన్ఫ్ల్యూయెంజా, కరోనా.. రెండూ సోకే ప్రమాదం ఉంది. కానీ ఈ రెండు వైరస్లు చాలా భిన్నమైనవి. మానవ శరీరంగా వేర్వేరు విధాలుగా దాడి చేస్తాయి. అయితే ఈ రెండు వైరస్లు కలిసి కొత్త వేరియంట్గా ఉద్భవించే అవకాశలనూ కొట్టిపారేయలేం. డిసెంబర్ 29నాటికి 128 దేశాలకు ఒమిక్రాన్ వ్యాపించింది. దక్షిణాఫ్రికాలో ఈ కేసులు ఒక్కసారిగా గణనీయంగా పెరిగాయి. ఆ తర్వాత అంతే వేగంతో భారీగా తగ్గాయి. కానీ మిగతా దేశాల్లో మాత్రం పరిస్థితి ఇందుకు భిన్నంగా ఉంది. ఒమిక్రాన్ ఊపిరితిత్తులపై కాకుండా శ్వసకోశ వ్యవస్థపైభాగంలో దాడి చేస్తోందని తాజా అధ్యయనాలు స్పష్టం చేస్తున్నాయి. ఇది నిజంగా శుభపరిణామం. వైరస్ ముప్పు అధికంగా ఉన్నవారు, వ్యాక్సిన్ తీసుకోనివారిపై మాత్రం ఈ వైరస్ తీవ్ర ప్రభావం చూపుతోంది. ఒమిక్రాన్ వేరియంట్.. ఇతర వేరియంట్లను వారాల్లోనే అధిగమించగలదు. వ్యాక్సిన్ తీసుకోని వారు, జనసాంద్రత ఎక్కువ ఉన్న ప్రాంతాల్లో ఇది విభృంభిస్తుంది. డెన్మార్క్లో ఆల్ఫా వేరియంట్ కేసులు రెట్టింపు కావడానికి రెండు వారాలు పడితే.. ఒమిక్రాన్ కేసులు మాత్రం రెండు రోజుల్లోనే రెట్టింపు అయ్యాయి. దీన్ని బట్టి ఈ వేరియంట్ ఎంత వేగంగా వ్యాప్తి చెందుతుందో అర్థం చేసుకోవచ్చు. ప్రపంచం ఈ స్థాయిలో వ్యాప్తి చెందే వైరస్ను గతంలో ఎన్నడూ చూడలేదు."
-అబ్ది మహముద్
డబ్ల్యూహెచ్ఓ వ్యూహాత్మక నిపుణుల సలహా సంఘం(SAGE) జనవరి 19న సమావేశమై ప్రస్తుత పరిస్థితిపై సమీక్ష నిర్వహించనుంది. ప్రజలకు కరోనా టీకా బూస్టర్ డోసులు ఎప్పుడు ఇవ్వాలి, వ్యాక్సిన్ల మిక్సింగ్, భవిష్యత్ టీకాలు వంటి అంశాలు ఈ భేటీ ఎజెండాలో ఉన్నాయి.
ఇదీ చదవండి: ఫ్రాన్స్లో కరోనా కొత్త వేరియంట్.. ఒమిక్రాన్ కంటే డేంజర్!
