ప్రపంచంపై కరోనా మహమ్మారి పంజా విసురుతోంది. ఈ క్రమంలో కరోనా వ్యాక్సిన్, పరీక్షలు, చికిత్సావిధానాల అభివృద్ధి, పరిశోధనలు వేగవంతం చేసేందుకు.. ప్రపంచ ఆరోగ్య సంస్థ నేతృత్వంలోని కార్యక్రమాలకు తక్షణమే 35 బిలియన్ డాలర్లు సాయం చేయాలని కోరింది ఐక్యరాజ్య సమితి(ఐరాస). నిధులు అందించేందుకు సభ్య దేశాలతో పాటు ఇతరులు ముందుకు రావాలని పిలుపునిచ్చారు ఐరాస ప్రధాన కార్యదర్శి ఆంటోనియా గుటెరస్.
డబ్ల్యూహెచ్ఓ నేతృత్వంలో నిర్వహించిన 'యాక్ట్ ఆక్సిలరేటర్' సమావేశంలో ఈ మేరకు దాతలను కోరారు గుటెరస్.
"వచ్చే మూడు నెలల్లోపు 15 బిలియన్ డాలర్లు అందించకపోతే.. కరోనా పరిశోధనలు ముందుకు తీసుకెళ్లటం, కొత్త పరీక్షలు, ఔషధాల తయారీ, సరఫరా పెంచే అవకాశాలను కోల్పోతాం. ప్రపంచం సాధారణ పరిస్థితికి వచ్చేందుకు అంతర్జాతీయ పరిష్కార అవకాశాలను మెరుగుపరిచేందుకు తక్షణ నిధుల సమీకరణ అవసరం. ఇప్పటి వరకు డబ్ల్యూహెచ్ఓకు కేవలం 3 బిలియన్ డాలర్ల కంటే తక్కువ నిధులే అందాయి."
- ఆంటోనియా గుటెరస్, ఐరాస ప్రధాన కార్యదర్శి
కరోనా వ్యాక్సిన్ కోసం ఔషధ సంస్థలతో చేసుకునే ఒప్పందాలు నిలిచిపోవటంపై హెచ్చరించారు డబ్ల్యూహెచ్ఓ చీఫ్ టెడ్రోస్ అధనోమ్. అది కరోనా మహమ్మారి అంతం చేయటంలో పురోగతిని అడ్డుకోవచ్చని, అందరికీ సమానంగా వ్యాక్సిన్ అందించే అంశంలో రాజీపడాల్సి రావొచ్చని పేర్కొన్నారు.
ఇదీ చూడండి: 'సురక్షితమని తేలనిదే ఏ వ్యాక్సిన్ను ఆమోదించం'
