ప్రముఖ సామాజిక మాధ్యమం ఫేస్బుక్కు బ్రిటన్‌ కాంపీటీషన్‌ రెగ్యులేటర్‌ భారీ జరిమానా విధించింది. తాము అడిగిన వివరాలు సమర్పించడంలో ఫేస్‌బుక్‌ నిర్లక్ష్యపూరితంగా వ్యవహరించిందని, అందుకే రూ.515 కోట్లు (50.5 మిలియన్‌ పౌండ్లు) జరిమానాగా చెల్లించాలని ఆదేశించినట్లు తెలిపింది. ఏ కంపెనీ అయినా చట్టానికి లోబడి ఉండాల్సిందేనన్న హెచ్చరిక పంపించాలన్న విధానాల మేరకు ఈ జరిమానా విధించినట్లు పేర్కొంది.
యూనిమేటెడ్‌ సంస్థ జిఫీని గతేడాది ఫేస్‌బుక్‌ కొనుగోలు చేసింది. అయితే, జిఫీ కొనుగోలు ద్వారా సామాజిక మాధ్యమాల మధ్య పోటీని ఫేస్‌బుక్‌ నియంత్రిస్తోందన్న ఆరోపణలపై బ్రిటన్‌ కాంపీటీషన్‌ అండ్ మార్కెట్స్‌ అథారిటీ (సీఎంఏ) విచారణ చేపట్టింది. ఈ వ్యవహారంలో వివరాలు ఇవ్వాలని పలుమార్లు కోరినప్పటికీ వాటిని సమర్పించడంలో ఫేస్‌బుక్‌ ఉద్దేశపూర్వకంగానే వెనుకడుగు వేసిందని సీఎంఏ పేర్కొంది. మరోవైపు సీఎంఏ నిర్ణయంపై ఫేస్‌బుక్‌ స్పందించింది. ఈ నిర్ణయాన్ని వ్యతిరేకిస్తున్నామని పేర్కొంది. సీఎంఏ నిర్ణయంపై సమీక్షించి తదుపరి అవకాశాలను పరిశీలిస్తామని తెలిపింది.
ఇదీ చదవండి: కరోనా మరణాల రికార్డ్- వారం పాటు కార్యాలయాలు బంద్!
