Ambulance Driver Left Heart Patient on Road : గుండెపోటుతో ప్రాణాపాయ స్థితిలో ఉన్న వ్యక్తిని తమ పరిధి కాదంటూ హాస్పిటల్కు తీసుకెళ్లకుండా అంబులెన్స్ డ్రైవర్ మార్గ మధ్యలోనే దింపేసిన ఘటన ఇది. మానవత్వానికి మచ్చ తెచ్చేలా ఉన్న ఈ ఘటన జయశంకర్ భూపాలపల్లి జిల్లాలో జరిగింది. కాళేశ్వరం మండలం కన్నెపల్లి గ్రామానికి చెందిన శనిగరం బాపురెడ్డి అనే వ్యక్తికి శనివారం గుండె పోటు వచ్చింది. గమనించిన కుటుంబసభ్యులు వెంటనే మహదేవపూర్లోని ఓ ఆసుపత్రికి తరలించారు. అనంతరం మెరుగైన వైద్యం కోసం వరంగల్ ఎంజీఎంకు తరలించాలని అక్కడి వైద్యులు సూచించడంతో వెంటనే అంబులెన్స్కు ఫోన్ చేశారు. అందుబాటులో లేదని సమాధానం రావడంతో తమకు సమీప బంధువైన మహదేవపూర్ ప్యాక్స్ ఛైర్మన్ చల్ల తిరుపతి కారులో రోగిని ఎక్కించుకుని బయలుదేరారు.
కారులో ఆక్సిజన్ సౌకర్యం లేకపోవడం, బాపురెడ్డి గుండెనొప్పితో తీవ్రంగా బాధపడుతుండటం చూసి చలించిపోయిన కుటుంబసభ్యులు ప్రయాణం చేస్తూనే మరోమారు అంబులెన్స్కు ఫోన్ చేశారు. భూపాలపల్లి సమీపంలోకి వచ్చాక 108 వాహనం రావడంతో రోగిని అందులోకి మార్చారు. సిబ్బంది అతడికి ఆక్సిజన్ పెడుతూ కొద్ది దూరం తీసుకెళ్లారు. ఈ క్రమంలోనే వరంగల్ ఎంజీఎం ఆసుపత్రికి వెళ్లాలంటూ బంధువులు డ్రైవర్కు సూచించారు. అయితే తమ పరిధి భూపాలపల్లి వరకేనంటూ వారిని జిల్లా పాలనాధికారి సముదాయాల గేటు (నేషనల్ హైవే) వద్ద దింపేసి డ్రైవర్ అక్కడి నుంచి వెళ్లిపోయాడు.
మా మేనేజర్ వరంగల్ వెళ్లొద్దన్నారు : దీంతో చేసేదేమీ లేక తిరుపతి మళ్లీ తన కారులోనే రోగిని ఎక్కించుకుని వరంగల్లోని ఓ ప్రైవేట్ హాస్పిటల్లో చేర్పించగా, ప్రస్తుతం ఆయన ప్రాణాపాయ స్థితి నుంచి క్షేమంగా బయటపడ్డారు. దీంతో కుటుంబసభ్యులు ఊపిరి పీల్చుకున్నారు. అనంతరం ఘటనకు బాధ్యులుగా చేస్తూ 108 జిల్లా మేనేజర్, వాహన డ్రైవర్లపై చర్యలు తీసుకోవాలంటూ ప్యాక్స్ ఛైర్మన్ తిరుపతి జిల్లా కలెక్టర్ రాహుల్ శర్మకు ఫిర్యాదు చేశారు. వెంటనే స్పందించిన పాలనాధికారి చర్యలు తీసుకుంటామని హామీ ఇచ్చినట్లు ఆయన తెలిపారు. ఎందుకు ఇలా చేశారంటూ అంబులెన్స్ డ్రైవర్‌ను నిలదీస్తే, తమ పరిధి ఇక్కడి వరకేనని, వరంగల్ వెళ్లొద్దని తమ జిల్లా మేనేజర్ చెప్పారని చెప్పినట్లు వెల్లడించారు.
30 ఏళ్ల వయసులోనే గుండె నొప్పి.. కారణం ఇదేనా?
బస్సు నడుపుతుండగా గుండెపోటు - స్టీరింగ్పైనే పడిపోయిన డ్రైవర్
