బ్రిటన్లో 33 ఏళ్ల మహిళ హత్యపై వెల్లువెత్తిన నిరసనలతో బ్రిటన్ ప్రభుత్వం స్పందించింది. మహిళలు, బాలికల భద్రత కోసం పటిష్ఠ చర్యలు చేపట్టాలని నిర్ణయం తీసుకుంది. ఇందులో భాగంగా వీధి దీపాలు, సీసీటీవీ కెమెరాల ఏర్పాటుకు నిధులను పెంచేందుకు సిద్ధమైంది. పైలట్ ప్రాజెక్టుగా.. బార్లు, నైట్ క్లబ్బుల పరిసరాల్లో యూనిఫామ్లో లేని పోలీసులను మోహరించాలని భావిస్తోంది.
మహిళ భద్రత కోసం ప్రస్తుత కేటాయింపులకన్నా రెట్టింపు స్థాయిలో(45 మిలియన్ పౌండ్లు) ఖర్చు చేయనున్నామని బ్రిటన్ ప్రధాన మంత్రి బోరిస్ జాన్సన్ సోమవారం తెలిపారు.
కొనసాగుతున్న నిరసనలు
33 ఏళ్ల సారా ఎవెరార్డ్ కిడ్నాప్, హత్యకు నిరసనగా జరుగుతున్న ప్రదర్శనలతో బ్రిటన్ హోరెత్తుతోంది. ఈ కేసులో ఓ పోలీస్ అధికారిని మెట్రోపాలిటన్ కోర్టు దోషిగా తేల్చిన నేపథ్యంలో దేశవ్యాప్తంగా పోలీసులపై తీవ్ర వ్యతిరేకత వ్యక్తమవుతోంది. కరోనా నిబంధనలు లెక్కచేయకుండా ప్రజలు పెద్ద ఎత్తున లండన్ రోడ్లపైకి వచ్చి పోలీస్ చర్యకు వ్యతిరేకంగా ఆందోళనలు చేపట్టారు. పలువురు నిరసనకారులను పోలీసులు అరెస్టు చేశారు.
మార్చి 3న.. బ్రిటన్ సౌత్ లండన్లోని క్లాఫమ్ నుంచి బ్రిక్స్టన్కు నడుచుకుంటూ వెళ్తున్న సారా ఎవెరార్డ్ కిడ్నాప్కు గురయ్యారు. లండన్కు 100 కిలోమీటర్ల దూరంలోని వుడ్ ల్యాండ్ ప్రాంతంలో ఆమె మృతదేహం లభ్యమైంది.
ఇదీ చూడండి:ఆస్ట్రాజెనెకా టీకాపై నిషేధం ఎందుకు?
