కరోనా మహమ్మారి విజృంభణ నేపథ్యంలో భారత్ నుంచి వచ్చే ప్రయాణికులపై ఆంక్షలు విధించిన బ్రిటన్.. వాటిని కొంచెం సడలిస్తూ నిర్ణయం తీసుకుంది. ఇప్పటివరకు భారత్ను రెడ్ జాబితాలో ఉంచిన యూకే ప్రస్తుతం పసుపు జాబితాలో మార్చింది. ఈ నిర్ణయంతో భారత్ నుంచి వచ్చే ప్రయాణికులు వ్యాక్సినేషన్ పూర్తి చేసుకొని ఉండాలి. అటువంటి వారికి 10 రోజుల హోటల్ క్వారంటైన్ నుంచి మినహాయింపునిచ్చింది.
హోం క్వారెంటైన్ తప్పనిసరి..
భారత్ నుంచి వెళ్లిన ప్రయాణికులు రెండు డోసులు తీసుకున్నట్లైతే.. యూకే వెళ్లిన తరువాత హోటల్ క్వారంటైన్లో ఉండాల్సిన అవసరం లేదు. అలాంటి వారికి ఇళ్లలోనే ఉండాలని యూకే ప్రభుత్వం సూచించింది. అంతేగాక ప్రయాణికులు యూకేలో ఎక్కడ ఉంటున్నారనే ఫారాన్ని పక్కాగా పూర్తి చేసి వెళ్లాలని స్పష్టం చేసింది. గతంలో మాదిరిగా ప్రభుత్వం ఆమోదించిన క్వారెంటైన్ కేంద్రాల్లో డబ్బులు కట్టి ఉండాల్సిన అవసరం లేదని పేర్కొంది. అంతేగాకుండా యూకేలో గానీ, ఐరోపా దేశాల్లో టీకా తీసుకున్న వారు హోం క్వారెంటైన్లో ఉండాల్సిన అవసరం లేదని తెలిపింది.
తాము ఆమోదించిన కొవిడ్ వ్యాక్సిన్ రెండు డోసులు వేయించుకున్న వారు మాత్రమే రావొచ్చని అక్కడి ప్రభుత్వం ఉత్తర్వులు జారీచేసింది. తమ ప్రభుత్వం ఆమోదించిన భారతీయ వ్యాక్సిన్లో కొవిషీల్డ్ ఉందని పేర్కొంది యూకే.
ఇదీ చూడండి: డెల్టా గుప్పెట్లో ప్రపంచదేశాలు- అమెరికాలో లక్షకుపైగా కేసులు
