కరోనా డెల్టా వేరియంట్(Delta variant) విజృంభణ కారణంగా ప్రపంచ వ్యాప్తంగా కొవిడ్ కేసుల(Covid cases) సంఖ్య గణనీయంగా పెరుగుతుందని ప్రపంచ ఆరోగ్య సంస్థ(డబ్ల్యూహెచ్ఓ) హెచ్చరించింది. విస్తృత స్థాయిలో టీకా పంపిణీ ప్రక్రియ చేపట్టకపోవడం వల్ల వైద్యవ్యవస్థపై తీవ్ర ఒత్తిడి పడుతుందని ఆందోళన వ్యక్తం చేసింది. ఈ మేరకు మంగళవారం విడుదల చేసిన వీక్లీ కొవిడ్-19 నివేదికలో పేర్కొంది.
జులై13 వరకు 111 దేశాల్లో డెల్టా వేరియంట్ వ్యాపించిందని డబ్ల్యూహెచ్ఓ తెలిపింది. ఈ వేరియంట్ కారణంగా కేసుల్లో పెరుగుదల కొనసాగే అవకాశం ఉందని చెప్పింది. రానున్న నెలల్లో ప్రపంచ వ్యాప్తంగా ఈ వేరియంట్ ఆదిపత్య వేరియంట్గా మారుతుందని అంచనా వేసింది.
నివేదికలోని ముఖ్యాంశాలు..
- ప్రపంచ వ్యాప్తంగా 178 దేశాల్లో ఆల్ఫా వేరియంట్ గుర్తింపు.
- 123 దేశాల్లో బీటా వేరియంట్ కేసులు నమోదు.
- 75 దేశాల్లో గామా వేరియంట్ వ్యాప్తి.
- మిగతా ఆందోళనకర వేరియంట్ల(variants of concerns) కన్నా డెల్టా వేరియంట్ ఉద్ధృతి అధికంగా ఉంది.
- చాలా దేశాల్లో కొవిడ్ నిబంధనల్లో సడలింపులు ఇవ్వటం, ఎక్కువ మందికి టీకా పంపిణీ చేయకపోవడం వల్ల.. కేసుల సంఖ్య పెరుగుతోంది. ఆస్పత్రుల్లో చేరేవారి సంఖ్య, మృతుల సంఖ్య ఎక్కువవుతోంది.
- చాలా ప్రాంతాల్లో వైరస్ వ్యాప్తిపై పర్యవేక్షణ కొరవడుతోంది. ఫలితంగా ప్రస్తుతం, భవిష్యత్లో విజృంభించే వేరియంట్లపై అప్రమత్తత లేకుండా పోతోంది.
వ్యాక్సినేషన్లో అసమానతలు..
ప్రపంచ వ్యాప్తంగా 300 కోట్లకు పైగా టీకా డోసులు పంపిణీ జరిగిందని డబ్ల్యూహెచ్ఓ తెలిపింది. ప్రపంచ జనాభాలో.. దాదాపు మూడో వంతు మంది(24.7శాతం).. కొవిడ్ టీకా మొదటి డోసు తీసుకున్నారని చెప్పింది. సంపన్న, మధ్య ఆదాయ దేశాల్లోనే ఎక్కువ మందికి టీకా అందిందని చెప్పింది. టీకా పంపిణీలో అసమానతలను తొలగించే దిశగా 'కొవాక్స్' కార్యక్రమం కొనసాగుతోందని పేర్కొంది.
10శాతం పెరుగుదల..
జులై5 నుంచి జులై 11 వరకు ప్రపంచ వ్యాప్తంగా ముప్పై లక్షల కరోనా కేసులు వెలుగు చూసినట్లు డబ్ల్యూహెచ్ఓ తెలిపింది. అంతకుముందు వారంతో పోలిస్తే కేసుల సంఖ్య 10శాతం పెరిగినట్లు చెప్పింది. జులై 5 నుంచి 11 వరకు 55 వేల మంది కరోనా ధాటికి ప్రాణాలు కోల్పోయారని తెలిపింది. ఇది అంతకుముందు వారంతో పోలిస్తే 3శాతం అధికమని చెప్పింది.
ఇదీ చూడండి: Vaccine Mixing: ' రెండు వేర్వేరు టీకాలు కలిపితే అంతే!'
ఇదీ చూడండి: ఆ టీకా తీసుకుంటే అతికొద్ది మందికి అరుదైన వ్యాధి!
