Shelling in east Ukraine: ఫిరంగి దాడులతో తూర్పు ఉక్రెయిన్ దద్దరిల్లుతోంది. రష్యా వేర్పాటువాదులు రెచ్చిపోతున్నారు. ఏకంగా అక్కడి సైనికాధికారులపైనే వందలాదిగా మోర్టార్లు, ఫిరంగులు ప్రయోగిస్తున్నారు. ఆదివారం కూడా ఇది పునరావృతమైంది. ఈ నేపథ్యంలో వేలాది మంది పౌరులు.. ఆ ప్రాంతాన్ని ఖాళీ చేస్తున్నారు. ఇవన్నీ రష్యా- ఉక్రెయిన్ యుద్ధభయాలను మరింత పెంచుతున్నాయి. ఎప్పుడేం జరుగుతుందోనని ప్రపంచ దేశాలు ఆందోళన చెందుతున్నాయి.
Russia Ukraine War: ఉక్రెయిన్పై దాడి చేసేందుకు రష్యా సరిహద్దుల వద్ద సిద్ధంగా ఉందని.. పశ్చిమాసియా దేశాల నేతలు హెచ్చరిస్తున్నారు. దాదాపు లక్షా 50 వేల మంది రష్యా సైనికులు ఉక్రెయిన్ను చుట్టుముట్టారని, యుద్ధవిమానాలు, ఇతర సామగ్రితో ఏ క్షణమైనా దాడి చేయొచ్చని సంకేతాలు ఇచ్చారు.
సైనిక విన్యాసాలు..
Russia Nuclear Drills: రష్యా శనివారం భారీ స్థాయిలో సైనిక విన్యాసాలు నిర్వహించింది. అణుబాంబులను మోసుకెళ్లే బాలిస్టిక్ క్షిపణులు ఇందులో పాల్గొన్నాయి. రష్యా అధ్యక్షుడు పుతిన్ స్వయంగా.. ఈ అణుపాటవ ప్రదర్శనను వీక్షించారు. సైనిక సన్నద్ధతపై సమీక్షించారు.
ఆదివారం కూడా బ్లాక్ సీ తీరం వద్ద నావికా విన్యాసాలు నిర్వహించింది రష్యా.
అమెరికా సహా అనేక ఐరోపా దేశాలు.. రష్యా ఉద్రిక్తతల్ని పెంచుతోందని ఆరోపించాయి. ఉక్రెయిన్పై దండెత్తితే.. రష్యాపై కఠిన ఆంక్షలు తప్పవని ఎప్పటినుంచో హెచ్చరిస్తున్నాయి. ఇవేం పట్టించుకోని రష్యా.. పెద్దఎత్తున సైనిక ప్రదర్శన చేస్తోంది.
చర్చలకు సిద్ధం..
Russia Ukraine Conflict: ఉద్రిక్తతల్ని తగ్గించే ప్రయత్నాల్లో భాగంగా ఉక్రెయిన్ అధ్యక్షుడు జెలెన్స్కీ శనివారం కీలక ప్రతిపాదన తెచ్చారు. ఈ సంక్షోభానికి ముగింపు పలికేందుకు చర్చలకు సిద్ధమని, ఎక్కడ కలుద్దామో చెప్పాలని పుతిన్ను కోరారు. తమ దేశం దౌత్యమార్గంలోనే శాంతియుత పరిష్కారం కోసం చూస్తోందని స్పష్టం చేశారు. అయితే.. దీనిపై రష్యా నుంచి ఎలాంటి స్పందన లేదు.
సైనిక సమీకరణ..
మరోవైపు.. తూర్పు ఉక్రెయిన్లోని రష్యా అనుకూల తిరుగుబాటు దారులు భారీ సైనిక సమీకరణ చేపట్టారు. చాలా మంది పౌరుల్ని రష్యాకు తరలించడమే కాకుండా.. తమ సైన్యంలో చేరాలని పిలుపునిస్తున్నారు.
వెనక్కి రండి..
రష్యా మరికొద్దిరోజుల్లో ఉక్రెయిన్పై దాడి చేయనున్నట్లు అమెరికా నిఘా విభాగానికి సంకేతాలు అందాయని ఆ దేశ అధ్యక్షుడు జో బైడెన్ ఇటీవల చెప్పారు. ఉక్రెయిన్ సరిహద్దుల్లో రష్యా మోహరించిన సైన్యంలోని 40- 50 శాతం దళాలు దాడి చేసేంత సమీపంలో ఉన్నాయని అమెరికా రక్షణ వర్గాలు తెలిపాయి.
యుద్ధమేఘాలు అలముకున్నవేళ ఉక్రెయిన్ విడిచిరావాలని జర్మనీ, ఆస్ట్రియా, భారత్ సహా పలు దేశాలు తమ పౌరులకు సూచించాయి. రాజధాని కీవ్కు లుఫ్తాన్సా తమ విమానాలను రద్దు చేసుకుంది.
ఉక్రెయిన్లో బస తప్పనిసరి కాని భారత పౌరులు, విద్యార్థులు తాత్కాలికంగా ఆ దేశం వదిలిరావాలని సూచించింది కేంద్ర ప్రభుత్వం. ఛార్టర్ ఫ్లైట్లు అందుబాటులో ఉన్నాయని, ఆ సమాచారం కోసం సంబంధిత అధికారులను సంప్రదించాలని స్పష్టం చేసింది.
నాటో కూటమి కూడా కీవ్లోని తమ కార్యాలయంలోని అధికారులను.. బ్రసెల్స్కు, ఉక్రెయిన్లోని లవీవ్ నగరానికి తరలిస్తున్నామని ప్రకటించింది.
ఇవీ చూడండి: ఉక్రెయిన్ సైన్యంపై బాంబుల వర్షం.. భయంతో పరుగులు!